Пратеникот на Левицата, Борислав Крмов најави дека ќе се обидат да го спречат донесувањето на законите за коридорите 8 и 10д, но дека клучна е опозициската ВМРО-ДПМНЕ чии пратеници раководат со три собраниски комисии. Според Крмов, ако некој од законите помине ќе помине бидејќи тоа го сака ВМРО-ДПМНЕ.

„Ние со два пратеника ќе дадеме сè од себе ова да го спречиме со сите расположливи средства што ги имаме“. Сите други комисии може да се сопрат. Други комисии се четири, од кои три ги раководи опозицијата. Да не ја лажат јавноста дека не може да се спречи. Според наши информации, власта ќе се обиде да ни ги групира амандманите и да ја туркаат говорницата на сила, можеби ќе се обидат да одземат збор. Јас моето уставно право како пратеник ќе го бранам, макар и физички“, рече Крмов.

Левица е против законите бидејќи изведувачот на автопатиштата „Бектел и Енка“ ќе добие многу привилегии со измена на законите, односно дека ќе влеземе во корпоративен феудализам каде што за корпорациите не важат законите, туку тие ќе важат само за обичните смртници.

„Тие закони, иако беа предложени од пратеници, не се сомневаме дека се од Владата. Со тие првично 9, сега 8 законски решенија конзорциумот „Бектел и Енка“, кој е изведувач, ќе биде ослободен од ДДВ, ќе биде ослободен од увоз, акцизата за енергенти ќе му се враќа, кога ќе се прави експропријација на земјиштето, нема да се чека конечна одлука, а македонските граѓани се тужат со државата или конзорциумот, ќе се фрла бетон или асфалт на нивната земја. Одобрувањето градежен проект се скратува, ќе може да се гради без проект. Се обезбедува полесна пренамена на земјоделското земјиште, ќе се сечат шуми, работа во недела – ова од Законот за работните односи и зголемување на осумчасовното работно време иако во државата имаме 40-часовно работно време. Влегуваме во вид на корпоративен феудализам, каде што за корпорациите не важат законите, туку тие ќе важат само за обичните смртници“, рече Крмов.