Од 2017 година до вчера, по разни основи од Кривичниот суд заминале 20 судии. На нивни места дошле тројца судии, но од нив една судијка е на трудничко боледување. Во овој момент судот располага со 48 судии, а според систематизацијата предвидено е да има 70 судии, изјави на денешниот брифинг со новинарите претседателот на Основниот суд Скопје 1, Иван Џолев.

Од судот велат дека за испразнетите судски места постојано писмено и усно се обраќаат до Судскиот совет. Тврдат дека за одредени предмети на судиите им е многу тешко да ги постигнат обврските бидејќи се оптоварени со многу случаеви.

Во овој суд, од поранешното Специјално јавно обвинителство се постапува по 10 предмети. Според зададените датуми за рочишта и според динамиката, постои голема можност за пет или шест предмети до 31 декември оваа година да има и пресуди.

Џолев вели дека и во екот на пандемијата, овој суд работел со целосна динамика, и притоа биле донесени пресуди за предмети „Тарифа“, Титаник-2“, „Рекет“, „Тревник“ и двете пресуди во одвоена постапка од случајот „27 Април“.