Одделението за внатрешни работи во Дебар денеска поднесе кривична пријава против дебранец поради узурпација на недвижности, со што противправно се стекнал со имотна корист во износ од 4.722.300 денари (околу 76.000 евра).

„Кривична пријава е поднесена против Г.Г.(59) од Дебар, кој на катастарска парцела во дебарската населба Венец, неовластено присвоил државно градежно земјиште во вкупна површина од 2385 метри квадратни и поставил бодликава жица и дрвени колци во висина од еден метар“, информираше Стефан Димоски, портпарол на СВР Охрид.

Ова е втора кривична пријава во последните неколку дена, поднесена под истите сомненија. Претходно, кривична пријава беше поднесна против Р.К.(47) од Дебар за „узурпација на недвижности“ и „бесправно градење“. Тој на катастарска парцела на улица „Елена Ѓика“ извршил доградба на деловен простор без одобрение за доградба, што е спротивно на Законот за градење.