Поднесена е кривична пријава против поранешен директор на подружницата „Стогово“ на ЈП „Национални шуми“ за злоупотреба на службена положба, со што на претпријатието му нанел штета од над 615.000 денари.

ОВР Дебар поднесе кривична пријава против 61-годишниот Л.Р. од Дебар поради постоење основи на сомнение за сторено кривично дело „злоупотреба на службена положба и овластување“ по член 353 од Кривичниот законик.

„Тој, во текот на 2024 година, во својство на директор на Јавно претпријатие за стопанисување со државни шуми ‘Национални шуми’, ПО Скопје, подружница ‘Стогово’- Дебар, објавил јавен повик за склучување договор за закуп на плац за складирање огревни дрва во Дебар, по што, со злоупотреба на службената положба и овластување, подметнал фиктивна понуда за плац, наводно навремено поднесена и со пропуштање должен надзор и увид дали парцелата ги исполнува минималните услови, наведени во јавниот повик, спротивно  на предвидените услови, склучил договор за подзакуп и закуп на недвижен имот градежно неизградено земјиште во Дебар. Со тоа, пријавениот на јавното претпријатие му нанел штета од 615.495 денари“, соопшти МВР.