Кремљ денес објави дека „ја зел предвид“ вчерашната изјава на американскиот претседател Доналд Трамп, кој рече дека ќе го скрати рокот што ѝ го даде на Москва за постигнување прекин на огнот во Украина или ќе се соочи со санкции.

Трамп вчера постави нов рок од 10-12 дена за Русија да постигне напредок кон завршување на војната во Украина или ќе се соочи со последици, нагласувајќи го неговото разочарување од претседателот Владимир Путин поради војната што трае повеќе од три и пол години.

Кремљ, прашан за изјавите на Трамп вчера за време на брифингот со новинарите, даде кратка изјава.

„Ја зедовме предвид вчерашната изјава на претседателот Трамп. Специјалната воена операција продолжува“, рече портпаролот на Кремљ, Дмитриј Песков, користејќи го терминот што Москва го усвои за војната што ја води во Украина.

„Остануваме посветени на мировниот процес за решавање на конфликтот околу Украина и за заштита на нашите интереси во текот на ова решение“.

Трамп се закани на 14 јули дека ќе воведе нови санкции врз Русија и купувачите на нејзините извозни производи во рок од 50 дена, рок што ќе истече на почетокот на септември.

Сепак, вчера за време на неговата посета на Велика Британија, тој објави дека ќе го скрати овој рок, велејќи: „Нема причина да се чека… Едноставно не гледаме никаков напредок“.

Трамп, кој имаше шест телефонски разговори со лидерот на Кремљ откако се врати во Белата куќа во јануари, исто така рече дека „веќе не е толку заинтересиран да разговара“.

Песков одби да ја коментира оваа изјава на американскиот претседател.

Трамп го притиска Путин, се закани дека ќе го скрати рокот од 50 дена за прекин на огнот во Украина