Според премиерот Димитар Ковачевски замрзнувањето на цените на прехранбените производи и нивно намалување, преку обезбедување гарантирана цена, како и со владината одлука за допрецизирање на повластената стапка на ДДВ од 5 проценти за најголем дел од основните прехранбени производи е создадена солидна основа за да постигнеме инфлација од 5 проценти до крајот на годината. Ковачевски е уверен дека реална и остварлива.

Тој потсети дека нашата земја има најголема листа на производи со повластена стапка на ДДВ од пет проценти во регионот, а тоа се дури 1.650 основни производи.

-Нашата земја има најниска стапка на ДДВ во регионот. Основната е 18 отсто, а во Србија таа е 20, во Хрватска 25, во Албанија 20, а во Грција е 21 отсто. Носевме и ќе носиме одлуки во согласност со движењата на пазарот и нема да дозволиме никој да профитира на сметка на општото добро во време на криза. Затоа и донесовме мерки за да ги спречиме негативните пазарни трендови. Ќе продолжиме да ги штитиме домашната економија и граѓаните – порача Ковачевски.

Горан Трајковски, директор на Државниот пазарен инспекторат уште еднаш повтори дека граѓаните треба да бидат спокојни бидејќи ДДВ за основните прехранбени производи останува 5 отсто, а ДПИ е на терен и постојано врши надзор.

-ДДВ-то си останува 5 отсто за основната храна и не смее да има поскапувања, туку само намалувања. Сите граѓани кои ќе забележат некакви изигрувања на владините одлуки тоа треба да го пријават кај нас – рече Трајковски.

Според Трајковски, целта на ДПИ не е да казнува, ама некои компании не им оставаат избор и мора да сносат санкции, бидејќи се обидуваат да ги изигруваат законите.