Модуларните амбуланти во Скопје, кои што се изработени за Здравствен дом Скопје, не треба да му се платат на „Брако“ додека не завршат сите правосудни постапки, рече денеска премиерот Димитар Ковачевски, одговарајќи на новинарски прашања за пожарот во модуларната болница во Тетово каде животот го загубија 14 сограѓани.

За модуларните болници, според соопштението од Министерството за здравство, во моментот тече камата, која станала 200 илјади евра, поради задоцнето плаќање. Деновиве, пак, екс-министерот за здравство Беким Сали и актуелниот министер Фатмир Меџити се препукуваа на темата дали се платени или не се платени овие амбуланти, кои инаку биле подобрени со елаборат за пожар и со анекс договор.

-Преостанатите модуларни болници за Здравствениот дом Скопје, не се платени. Имаше поранешни министри кои почнаа политички да се препукуваат со своите наследници. Екс министерот за здравство Беким Сали има нарачано ревизија, ревизијата е доставена до Владата заедно со документите за неплатените модуларни болници. Врз основа на тие документи Владата одлучува, но плаќањето на преостанатите, според мене лично, ќе може да се заврши кога ќе завршат сите правосудни постапки, рече Ковачевски,

Според него, Обвинителството веќе и самото соопштило дека има отворен предмет и постапува за тоа од кои причини изгоре модуларната болница.

-Шефот на јавното обвинителство Љубомир Јовески е избран во Собрание и е професионалец како и другите јавни обвинители од браншата. Тој има своја кариера како и сите обвинители. Собранието во кој било момент може да постави прашање до кој  било обвинител, а пред се тука мислам на главниот обвинител  Јовески. Тој треба да е на располагање за кој било случај, особено за овој. Тоа беше најтрагичниот настан во нашата понова историја. Треба на вистински начин да се одлучи по кој било предмет и вистината да ја знаат сите. Тие самите соопштија дека има отворен предмет по кој се постапува, додаде Ковачевски.

За германското вештачење презентирано во документарецот на ИРЛ, премиерот кажа дека не е во ингеренции на Владата и никогаш не го видел.

-Владата и јас како премиер имаме апсолутно објективен став во однос на кој било случај, поединец и предмет. Правосудните органи се слободни да одлучуваат согласно закон и процедури кои што требало да се спроведат. Немало никакво мешање од никого. Другата документација нарачана од обвинителството како германското вештачење, не е во домен на владата. Го немам ни видено. Тие што го нарачале и што го имаат може да го коментираат, додаде премиерот.