Премиерот Димитар Ковачевски на 16 и 17 мај 2023 година ќе учествува на четвртиот Самит на Советот на Европа во Рејкјавик, Исланд, информираат од владината прес-служба.

На Самитот учество ќе земат претседатели на држави и влади на земји членки на Советот на Европа.

Во рамки на Самитот, на 16 мај, претседателот на Вадата Ковачевски ќе учествува на Тркалезна маса на која ќе се разговара за моделите за зачувување и развој на демократијата во време на огромни ризици по истата, а на која ќе земат учество и Претседателот на Европскиот Совет, Шарл Мишел, како и премиерите на Грузија, Норвешка, Италија, како и претседатели и министри за надворешни работи на повеќе земји од Европа, се вели во соопштението.

Како што информираат од Влада, на 17 мај Ковачевски ќе учествува Генералната дебата на Советот на Европа, на тема „Обединети за Европа”, а каде се предвидени воедно и воведни обраќања на премиерката на Исланд Јакобсдотир, генералната секретарка на Советот на Европа, Пејчиновиќ-Буриќ како и претседателот на Парламентарно Собрание на Советот на Европа, Тини Кокс.

Од Владата информираат дека е планирано претседателот на Владата да оствари средби и разговори со повеќе европски лидери.

Во состав на делегацијата која ја предводи премиерот Ковачевски е и Бојан Маричиќ, заменик на претседателот на Владата задолжен за европски прашања.