Ќе направиме сè за роденденот на Гоце Делчев на 4 февруари да биде одбележан во Скопје достоинствено и без провокации, уверува премиерот Димитар Ковачевски.

– Изјавата на официјална Софија е дека тие сакааат деескалација, потребна е деескалација. Ние сме држава која ги почна преговорите за членство со ЕУ и со брзо темпо се одвиваат поглавјата на билатерачниот скрининг. Провокации на поединци со име и презиме и кои се санкционирани согласно закон не може да бидат основ за да се смета дека целата наша држава и нашите институции имаат таков однос. Ние на највисоко ниво го имаме издигнато остварувањето на правото на граѓаните кои се самопределуваат на друг начин од Македонците кои сме најбројни и за тоа имаме институции, Устав, низа на закони какви нема ниедна земја во Еврооа и на тоа може да сме горди. Но, Бугарија е во избори и постојат политичари кои со национализам и популизам сакаат да освојат политички профит и глас повеќе, такви слични работи се случуваат и кај нас кога има избори, но тие не може да бидат основата за градење на односи меѓу двете држави – рече денеска Ковачевски.

Тој потсети дека имал телефонски разговор со бугарскиот колега Галаб Донев и му кажал дека македонските институции ќе направат сè за роденденот на Гоце Делчев на 4 февруари да биде одбележан на достоинствен начин без провокации.

– Бугарскиот министер за внатрешни работи и нивниот директор за државна безбедност се денеска во Скопје и имаат разговори со министерот за внатрешни работи Оливер Спасовски и директорот на АНБ Зарко Милошевски. Ние сме две земји-членки на НАТО, нашата и нивна служба за државна безбедност се две партнерски служби, министерствата за внатрешни работи се две партнерски министерства кои се дел од НАТО-системот. Нормално, информациите кои се за споделување, тие ќе ги споделат со цел за мирно и достоинствено одбележување – рече премиерот.