Покрај членството во ЕУ, како општество треба да почнеме посериозно да размислуваме и за увоз на работна сила од други држави, порача премиерот Димитар Ковачевски. Според него одливот на младото работоспособно население е проблем што ги мачи сите земји од Западен Балкан. Ковачевски додаде дека веќе долг период велиме дека во земјава никој не треба да дојде да работи и тоа е широко распространето во државава. Од друга страна, не ни пречи кога ќе видиме дека во Германија или во Франција доаѓаат и работат луѓе што не се таму родени.

– На темава ќе разговараме со сите чинители, со бизнисот, со Министерството за труд и социјала, со стопанските комори да се зголемат квотите за увоз на работници во земјава. Од Коморите веќе подолго време сигнализираат дека имаат недостиг од работна сила во одредени производствени гранки и дека е потребно да се зголемат квотите за зголемување на производството – соопшти Ковачевски.

Македонија годишно во просек издава по околу 5.000 работни визи за странци, неофицијално бројката на странски работници е далеку поголема, стои во анализата на Порталб.мк. Домашните бизнисмени особено од секторите градежништво, преработувачка и текстилна индустрија, угостителство, предупредуваат дека недостасуваат работници и дека состојбата е алармантна. Од друга страна, на крајот од август во земјава имало 104.729 невработени.

Претходно и вицепремиерот Фатмир Битиќи рече дека во изминатиот период ги сослушал и ги прифатил аргументите на фирмите, кои имаат големи проблеми поради недостиг на работна сила. Како што рече вицепремиерот, на земјава во моментов ѝ недостасуваат околу 10.000 работници.
Премиерот е дециден дека има начин да се задржат младите во земјава, а тоа е зачленувањето во ЕУ.

Според него, одливот на младото работоспособно население е проблем што ги мачи сите земји од Западен Балкан, а младите сакаат да живеат во ЕУ, дел во САД и мал дел во Австралија.

– Без да се залажуваме себеси, мора јасно и гласно да кажеме дека најдобриот начин да ги задржиме младите е да станеме дел од ЕУ. Вие сте свесни дека кога бевме дел од еден поширок сојуз, односно на бившата Југославија, имавме далеку поголем стандард од Бугарија, Полска, Чешка, Романија, Словачка и Унгарија и не можеше да се замисли некој наш работник да оди таму да работи. Да, одеа во Германија, но не и во источните земји. Кога се случило наши граѓани да одат да работат во Хрватска? Никогаш. А, зошто сега одат да работат таму, затоа што станаа дел од ЕУ. А со тоа, бројот на фирмите во Хрватска се зголемија за 33 проценти, добија 28 проценти поголем прилив на СДИ, имаат 80 до 90 отсто поголем БДП, двојно-тројно зголемени плати, а тоа го заслужуваат и нашите граѓани. Решението е земјава да стане членка на ЕУ – објасни Ковачевски, одговарајќи на новинарско прашање на настан во Прилеп, кој е најдобриот начин да ги задржиме младите луѓе во земјава.

Освен членството во ЕУ, Ковачевски, зборуваше и за политиките на зголемена поддршка на домашните инвестиции како една од можностите за отворање нови работни места.

– До 2015-2016 година постоеше само нетранспарентна поддршка на странските инвестиции, а откако почнавме со поддршка и на домашните инвестиции, само годинава имаме зголемување на бројот на вработени за 7.000 вработени. Бројот на невработените е намален од 26 на 13,1 отсто, вработеноста е зголемена за речиси 10 отсто, а догодина според буџетските мерки се очекувам намалување на невработеноста за уште два отсто. Многу скоро ќе дојдеме до едноцифрена бројка невработени – потсети премиерот.