Градоначалникот на Општина Бутел, Дарко Костовски поднесе иницијатива до Град Скопје со која бара да се вратат старите имиња на 38 улиците во оваа општина. Тој објасни дека до него во изминатиот период стигнале многу барања на граѓани по што се одлучил на ваков чекор, особено што, како што вели, поранешниот скопски градоначалник Петре Шилегов и Советот на Град Скопје донеле одлука за промена на имињата на улиците во Бутел без никаква консултација со граѓаните.

На ова остро реагираа од Демократската унија за интеграција, од каде излегоа со став дека ВМРО-ДПМНЕ со својата шовинистичка и авантуристичка политика свесно предизвикува меѓуетничка нетолеранција во Бутел.

Неодамнешната одлука на општина Бутел да ги оспори само албанските имиња на улиците на оваа мултиетничка општина во Скопје е уште една провокација која заслужува остра осуда од сите. Меѓуетничкиот соживот, функционалната мултиетничка демократија се основните вредности на нашата заедничка држава и само политичките кусогледи и противниците на европската иднина можат да сметаат дека оспорувањето на овие вредности за изборни или националистички цели може да помине и да даде некакви резултати за нив. Демократската унија за интеграција останува да биде чувар и главен промотор на соживотот, толеранцијата и можноста за слободно изразување на идентитетот и културните вредности на сите заедници во државата. Предизвикувачите на овие вредности ќе останат во темниот дел на историјата на оваа земја – стои во соопштението на ДУИ.

Костовски бара враќање на старите имињата на 38 улици во Бутел, од кои 20-тина сега се именувани според значајни личности од историјата и културата на Албанците.

Советот на Град Скопје во март 2021 година донесе одлука за промена на имињата на 478 улици, на пет мостови и три плоштади. Дел од новите имиња всушност претставување  враќање на старите имиња на познати скопски улици како што се Ленинова, Водњанска, Мексичка и други, кои  беа променети во времето кога на чело на Град Скопје беше градоначалникот Коце Трајановски.