Косовските институции упатија предупредување до патниците дека поради актуелните блокади на територијата на Србија треба да ги избегнуваат премините Јариње и Мердара. Наместо овие, на патниците им се препорачува да користат други премини. „Патот кон Краљево, на територијата на Србија, е блокиран од демонстранти кои го спречуваат минувањето на возилата. За да се избегне сообраќајниот метеж и препреките на патиштата кои водат кон Јариње и Мердар, ги советуваме патниците да ги користат другите премини до нормализирање на состојбата“, велат од Косовскиот центар за управување со премини, пишува Коссев.

Во меѓувреме со речиси идентично соопштение се огласи и косовското Министерство за надворешни работи. Но, тие во своето соопштение ги советуваат патниците да не го користат само преминот Јариње, а ги споменуваат и блокадите кај Краљево. Да потсетиме, студентските блокади траат повеќе од два месеци, додека речиси секој ден низ Србија се одржуваат протести на кои се бара исполнување на барањата поврзани со падот на натстрешницата во Нови Сад, при што загинаа 15 лица, а двајца беа тешко повредени.