Без победа во три одиграни натпревари ги заврши нашата машка сениорска репрезентација, олимписките претквалфикации во Талин.

Во третото коло од турнирот, подобра од Македонија беше селекцијата на Чешка.

Имавме само почетно водство од (5-4), но не и нешто повеќе од тоа во воведниот период, во кој Чесите лесно се одвоија на двоцифрени (19:8) по двете тројки на Крејчи.

Со четирите поени на Андоноски, односно серијата (8-0), во која учествуваше и Шортс, се доближивме на (16:19), а Маслинко не погоди за три во последната секунда за да донесе егал скор.

По 10.минути игра во Талин, Чешка водеше со (19:16). Одлично ги одигравме наредните седум…

Оние во кои дури и го вративме водството. Во 18.минута, по поентирањето на Ѓуроски (за три поени), Македонија одново водеше, сега со (35:30).

Но Чешка имаше одговор за нашата доста поефикасна игра во втората четвртина. Во рок до три минути противникот направи своја серија, од (15:2), која за момент ја сопре Магдевски, кој положи за (39:45) како што беше резултатот на полувремето.

Ти-Џеј Шортс уште еднаш го предводеше нашиот напад. Реализираше 12.поени во првото полувреме, седум даде капитенот Стојановски, Магдевски имаше еден помалку.

Имавме 30% на реализација во обидите за три поени (3/10), толерантни пет скока помалку во однос на ривалот (15 спрема 10).

Но не продолживме во ист таков, офанзивен стил по одморот. Тројките беа многу силно оружје на чешката селекција. Во неполни 24. минути погодија дури 12, имаа четири во серија за исто толку минути, кои им донесоа убедлива предност, од цели 20.поени (66:46), на средина на третата четвртина.

Но Шортс, потпомогнат од младиот Андоноски, не дозволија тоа да биде изразено и со повисоки бројки. До крајот на оваа делница, нашата селекција анулира добар дел од високата негатива.

Последниот период го дочекавме со резултат (58:71).

А по тројката на Стојановски, бевме уште поблиску, намаливме на (63:73) на почетокот на последната четвртина. Продолживме како што треба, капитенот со „два плус еден игра“ нè донесе и на -8 (71:79), на нешто повеќе од шест и пол минути пред крајот.

Но уште еднаш противникот го одби тој наш последен напад за пресврт. Двете тројки на Чесите, не одалечија на голема растојание, кое не успеавме да го „стигнеме“. Чешка поведе со недостижни (90:73), за нивна втора победа на овој собир во Талин.

Шортс уште еднаш беше на нивото на својата задача. Застана на 27. реализирани поени (имапе и пет успешни додавања), додека пак Стојановски го следеше со 13.поени (и по два скока и исто толку асистенции). Одлични минути забележа Андоноски, кој оваа средба во Талин ќе ја памети по постигнатите 14 поени (и два скока).