По пауза од два месеца коронавирусот повторно влегува во штипските конфекции. Заменик градоначалникот на Општина Штип, Јане Миланов и директорката на Центарот за јавно здравје (ЦЈЗ), Марија Димитрова потврдуваат дека позитивни случаи има кај работници во една голема штипска фабрика во ТИР зоната и во една помала конфекција.

На последниот кризен штаб, инспекторите, но и Кристина Ампева од „Гласен Текстилец“ побараа повторно да се зголемат контролите на автобускиот превоз, но и во вистинска смисла на зборот да функционираат ковид координаторите во фабриките, кои нема да дозволат групирање на работниците за време на паузите.

– Општинскиот Штаб за заштита и спасување ќе упати Барање до Комисијата за заразни болести и Централниот Штаб за изработка на конкретен Протокол за вршење на превоз на патници во внатрешниот патен сообраќај кој ќе го замени Протоколот за вршење на меѓуградски превоз од Одлуката за мерки за спречување на внесување и ширење на коронавирусот. Со донесување на овој протокол ќе се опфатат сите видови на превоз кои се одвиваат на територијата на Република Северна Македонија, посебно и видовите на превоз кои се одвиваат на територијата на локално ниво кои не се опфатени со Протоколот за вршење на меѓуградски превоз, се вели во заедничкото соопштение на Општинскиот кризен штаб-Штип.

Меѓу заклучоците се соработка на МВР со Државниот инспекторат за труд-Штип и останатите инспекторски служби со цел реализирање на засилени ненајавени надзори и контроли во угостителските објекти и компании со цел почитување на здравствените протоколи. Зголемени контроли на превозот од страна на Општинскиот инспектор каде најчесто транзитираат линиите за превоз со работници во текстилната индустрија.

Директорот на Клиничка болница-Штип, Ален Ѓеорѓијев информира дека на Инфективното одделение хоспитализирани се вкупно 48 пациенти од кои 41 се потврдени, а седум се сомнителни.

Во болнички услови починал и 70 годишен пациент од кочанскиот регион, а 14 пациенти се на повремена кислородна поддршка, ниту еден нема на респиратор.