Зад затворени врати, без присуство на медиумите, во моментов се одржува координативна средба помеѓу градоначалничката Данела Арсовска и координаторите на советничките групи во Советот на Град Скопје, на која Арсовска треба да го претстави својот план за надминување на проблемите со јавната чистота и со преводот во главниот град.

Пред почетокот на средбата советникот Гордан Шутаров од СДСМ, изрази оптимизам дека на средбата ќе биде предложен план за надминување на актуелната состојба во интерес на граѓаните и нагласи дека токму поради граѓаните нивната советничка група досега ги поддржала сите одлуки поврзани со јавната хигиена, превозот и слично. На прашањето што е проблемот сега и кој е виновен за настанатата состојба Шутаров рече дека се доцни со гласање на програмите за работа на јавните претпријатија.

Правев една споредба. Во 2021 година кога Советот го изгласал буџетот на Град Скопје за 2022 година, паралелно на тоа се изгласале и сите програми заклучно со месец февруари. За разлика од тогаш, во 2023 година дел од програмите не се гласаа ни до крајот на годината, а оваа година имаме изгласано само неколку програми, не се изгласани програмите за јавен превоз, за локален превоз на патници, не се изгласани програмите во делот на дополнителни активности во јавната чистота, паркови и зеленило. Генерално, јавните претпријатија треба да работат врз основа на изгласани програми од страна на Советот.  Иако сме имале одредени забелешки не сме сакале да бидеме кочничари во Градот Скопје, сме давале позитивно мислење за одредени програми, меѓутоа програмите за функционирање на јавните претпријатија не добија доволен број гласови, односно мнозинство за да бидат изгласани за да можат според нив да работат јавните претпријатија – рече Шутаров.

Според координаторот на советничката група на ВМРО-ДПМНЕ, Мартин Стојановски, програмите за кои градоначалничката тврди дека не се гласани, се изгласани. И тој е оптимист дека на средбата ќе се понудат издржани решенија.

Очекувавме да имаме седница денеска на Град Скопје , но имаме една затворена координација која требаше да биде јавна. Се надевам дека во иднина ваквите координации ќе бидат отвоорени за јавноста, за медиумите да можат да видат за што точно се работи и да ги слушнат аргументите и на советничките групи и на градоначалникот. Се надевам дека решенијата ќе бидат прифатливи доколку се аргументирани и издржани. Градоначалничката за програмите за кои тврди дека не се изгласани се изгласани, тие што не се изгладсани се изгласани со мнозинство, а тие што не се изгласани, како за новите автобуси, проаѓаат само со 6-7 гласа, што значи не само советничката група на ВМРО туку и останатите не ги гласаат – истакна Стојановски пред средбата со Арсовска.

Арсовска има рок до четврток да презентира програма за решавање на проблемите на скопјани