Регионалната платформа за култура „Кооператива“ на 13 јуни, во 18 часот, во просториите на КСП „Центар-Јадро“ ќе ја отвори изложбата „Архиви на пријателство – поетики на отпорот“.

– Главната мотивација зад оваа скромна рефлексија на работата на „Кооператива“ и нејзините членови е да се создаде можна мапа на поврзувања преку споделени искуства, заедничка работа и продукција во рамките на независната културна сцена. Размислувавме кои патеки и знаци, покрај главниот пат, создаваат можности за нови перспективи за различните значења на слободата, демократијата и автономните зони. Без да тврдиме дека создаваме стабилен историски наратив, со придонеси и размислувања од организации-членки, уметници и соработници кои активно не менуваат преку нивната работа, составивме можен колаж од искуства обликувани од взаемни влијанија.

Преку размена со голем број соработници, доживувајќи фрустрација, возбуда, незадоволство, разочарување и радост, се впуштивме во потфат на размислување со неизвесен исход. Движењето на „Кооператива“, и сите ние што се обединуваме во него, не е линеарно, туку диктирано од општата општествена динамика. Работиме и постоиме нелинеарно, без ред и редослед, набрзина. Организиран хаос, прекини, лабораториска структура – тоа е нашиот контекст во кој сè уште размислуваме за алтернативи. Оваа изложба е уште еден придонес кон нашиот заеднички хаос – истакнуваат од „Кооператива“.

Креатори на концептот и куратори на изложбата се Искра Гешоска и Милица Пекиќ, дизајнот на изложбата е на Дејан Драгосавац – Рута, а продуценти и соработници се Дејан Кошќак, Тијана Ана Спасовска и Ена Грабар.