ЈСП „Скопје“ конечно се сети во каква ужасна состојба се наоѓаат автобуските постојки во градот, па започна со бојадисување на клупите на станиците. Најсвежо фарбани, како што забележавме, се металните клупи на постојката кај МАНУ.

Од ЈСП нема информација дали ќе продолжат со обновување и на другите постојки и дали тоа ќе се сведе само на бојадисување.

Повеќето автобуски станици низ Скопје се сериозно оштетени, со ишкртани стакла или со остатоци од залепени информативни плакати, корпите за отпадоци речиси на сите постојки се искршени и не се функционални, а ниту хигиената не е на завидно ниво. На дел од постојките, како на пример, на булевар Борис Трајковски накај Драчево нема ниту настрешници на постојките, а не треба да се заборави дека на нив граѓаните чекаат автобус во сите временски пригоди – и на дожд и кога пече сонце.

На автобуските постојки време им е за ремонт, па да се надеваме дека обновата нема да заврши само со бојадисаната клупа кај МАНУ.