Компанијата која ја произвдува украинската ракета „Фламинго“ под антикорупциска лупа
Националното биро за борба против корупција на Украина (НАБУ) отвори истрага против водечкиот домашен производител на дронови и ракети со долг дострел – компанијата „Фајр Поинт“. Според информации на „Киев Индепендент“, се проверува дали фирмата ја измамила владата преку надувани цени и лажирани испораки.
Препорачано
Истражителите испитуваат и можни врски меѓу ко-сопственикот на поранешното филмско студио на претседателот Володимир Зеленски – Тимур Миндич – и крајните корисници на компанијата. Адвокатот на Миндич негира познавање на каква било врска со „Фајр Поинт“.
Од анонимност до водечки добавувач
До неодамна речиси непозната, „Фајр Поинт“ за кратко време стана еден од најголемите приматели на државни средства за набавка на беспилотни летала. Во 2024 година, компанијата продала дронови во вредност од 320 милиони долари – речиси третина од целиот буџет за дронови на Министерството за одбрана. Приходите нагло скокнале од 4 милиони долари (2023) на над 100 милиони (2024), а бројот на вработени се зголемил од само 18 на 2.200.
Документи до кои дојде „Киев Индепендент“ укажуваат дека „Фајр Поинт“ би можел да обезбеди државни договори вредни над 1 милијарда долари во 2025 година. Дополнително, компанијата доби и германско финансирање од 5 милијарди евра.
Зеленски ја фали „Фламинго“ ракетата
Украинскиот претседател неодамна јавно го пофали проектот на „Фајр Поинт“ – ракетата „Фламинго“, нарекувајќи ја „најуспешна“ во борбата против руските цели зад фронтот. Компанијата тврди дека 55–60% од дроновите погодуваат зададени цели, но индустриски извори велат дека дел од производите во 2024 година биле едвај функционални, иако државата веќе вложувала огромни средства.
Луѓето зад компанијата
Официјално, „Фајр Поинт“ ја водат Јехор Скалиха – поранешен филмски продуцент, и Ирина Терех – некогашна претприемачка во областа на бетонски инсталации, прогласена од „Форбс“ за една од „30 под 30“ во 2022 година. Тие неодамна беа назначени и во владиниот деловен совет, што дополнително поттикнува сомневања за политичко фаворизирање.
Борба за кредибилитет
Терех ги отфрли обвинувањата како „гласини“ и изјави дека Министерството за дигитална трансформација стои зад кампањата против „Фајр Поинт“. Таа нагласува дека „најлошото нешто што може да се случи за време на војна е да се краде од војна“, признавајќи ја реалноста на корупцијата во украинските одбранбени набавки.
