Во последно време се почесто се говори за скратување на работната недела од пет на четири работни денови.

Некои компании, но и земји веќе го прифатија ваквиот начин на работа, додека другите и натаму сметаат дека ваквиот начин на работа не е ефективен. Австралиската маркетинг агенција „Versa“ пред една година на своите вработени им воведе слободна среда.

Тифани Шраувен една од вработените во оваа комапнија, која при започнувањето со работа била фирмата била скептична во врска со ваквиот начин на работа:

„Со оглед дека работам како проект менаџерка, не верував дека таквиот начин на работење е можен. Стравував дека ќе морам да работам од дома, но сега гледа дека тоа не е така. Понекогаш нешто морам да одработам од дома кога не притискаат рокови, но во повеќето случаи, сите обврски ги завршувам порано и тогаш навистина ја имам таа слободна среда“, појаснува Шраувен.

Со ваквиот начин на работа агенцијата започна во јули минатата година, а како што истакнува директорката Кат Блекхам, приходите на компанијата пораснаа за 46 проценти, додека добивката е тројно зголемена, пишува „BBC“.

„Ако ваквиот концепт се покажа успешен во една индустрија, како што е маркетингот, не гледам причина тоа да се примени и во другите. На овој начин работниците ќе можат да добијат мал одмор од целата недела, да можат да останат дома, да бидат со децата или едноставно да уживаат“, истакнува Блекхам.

Според истражувањата на експертите, среда е најнепродуктивниот ден во неделата. Работниците се веќе изморени од понеделникот и вторникот, а во среда веќе размислуваат што ќе прават за време на викендот. Слободниот ден во средината на неделата на работниците им овозможува да ги „наполнат батеријата“ и на работа да се вратат одморени, а со тоа ќе им се зголеми нивната продуктивност.