Бизнисмените си ги бараат парите од солидарниот данок, а министерката за финансии Гордана Кочоска Димитриеска на средби ги убедува да прифатат пребивање. Откако Уставниот суд го поништи законот, државата ќе треба да им врати 49 милиони евра на 156 компании  во следните 5 години. Министерката за финaнсии ги информирала компаниите од Стопанската комора на Македонија дека исплатата на парите ќе биде голем товар за буџетот, но средствата ќе им бидат вратени во рок пократок од 5 години.

-Претстојат средби со компаниите на чиј предлог ќе се утврди динамиката на враќање. Со разговорите ќе се продолжи и во наредниот период ќе бидат подготвени предлози врз основа на кои ќе се разговара и ќе се решава ова прашање – соопштија од Министерството за финансии за ТВ Сител.

Од „Макстил“, компанијата која плати највисок износ на солидарен данок  –  4,2 милиони евра, веќе најавија дека ќе си ги бараат парите назад, но дека се подготвени да преговараат за динамиката на враќање. Најверојатно ќе се откажат од каматите кои им следуваат.

-Согласно законските можности и рокови, „Макстил“ ќе го започне процесот за барање за поврат на средствата исплатени за солидарниот данок. Дополнително, сме подготвени да ги договориме со Владата и Министерството за финансии, динамиката и точниот модалитет на враќање на средствата. Сметаме дека секоја одлука што излегува надвор од законските рамки, како што беше случајот со солидарниот данок, има значителни последици врз финансиската стабилност и буџетските политики, како и врз довербата на компаниите во институциите – велат од компанијата.

Подготвени на разговори за утврдување на динамиката и начинот на враќање на парите се и другите фирми, членки на комората, кои во 2023 та платија еднократна давачка, а парите се искористија за антикризни мерки. Во следниот период министерката за финансии најави средби и со останатите комори и здруженија.