Во привремена резолуција ResDH (2020) 197 на Комитетот на министрите на Советот на Европа што се однесува на извршување на пресудите на Европскиот суд за човекови права, особено на онаа на „Обединетата македонска организација Илинден и другите групи против Бугарија, се повикуваат бугарските власти да овозможат секое ново барање за регистрација на „ОМО Илинден” или слични здруженија да се разгледаат во целосна согласност со членот 11 од Конвенцијата, односно дозвола за нивна регистрација.

Бугарија е повикана да донесе и законодавни или други соодветни мерки како гаранција на агенцијата за регистрација кон една поширока и поефикасна обврска да ги насочува здруженијата да ги коригираат досиејата, секогаш кога тоа е објективно можно, со цел да се усогласи практиката за строго спроведување на формалните барања со ефективното остварување на правото на слобода на здружување.

Советот на Европа, исто така, ги повикува властите на Бугарија да пренесат порака и да продолжат со напорите за подигнување на јавната свест дека здруженијата што имаат за цел да го добијат „признавањето на македонското малцинство“, не смеат да бидат одбиени за регистрација врз основа на целите на здруженија и средства за нивно спроведување.

Комитетот на министри ги повикува „властите на Бугарија да ја финализираат својата работа за дополнување на упатствата за матичарите за покривање на прашањата што се дискутираат во оваа група на случаи и да се осигура дека Агенцијата за регистрација сеопфатно ги идентификува недостатоците во досиејата за регистрација, како што налага националното законодавство, за да им овозможи на здруженијата брзо да аплицираат со исполнување на сите законски услови”.

Во согласност со член 46, став 2 од Конвенцијата за заштита на човековите права и основните слободи, Комитетот го надгледува извршувањето на конечните пресуди на Европскиот суд за човекови права. Оваа најнова резолуција на Комитетот на министрите е донесена откако се земени во предвид конечните пресуди што Судот ги достави до Комитетот во овие случаи и утврдените повреди во врска со неоправдано одбивање од судовите во периодот меѓу 1999 година и 2015 година за регистрација на здруженија со цел да се добие признавање на „македонското малцинство во Бугарија”, засновано врз размислувања за националната безбедност, заштитата на јавниот ред и правата на другите (наводни сепаратистички идеи) и уставната забрана за здруженија кои извршуваат политички цели, како и непочитување на формалните законски барања (прекршувања од член 11).

Комитетот меѓу другото забележува дека од 2006 година, „ОМО Илинден” не е во можност да има полза од процедурите за регистрација во согласност со Конвенцијата. Постојано биле одбивани да се регистрираат врз основа на можноста здружението да го промовира постоењето на „македонско малцинство”.

Комитетот, исто така, забележува дека здружение слично на „ОМО Илинден” неодамна било предмет на постапка за распуштање, непосредно по нејзиното регистрирање од слични причини и дека постапката е покрената од обвинителството по писмо од член на влада.

Воедно, Комитетот на министри ја истакнува обврската на секоја држава, согласно член 46 став 1 од Конвенцијата, да ги почитува конечните пресуди на Европскиот суд во секој случај во кој таа е странка, целосно, ефикасно, навремено и со добра волја.

Спроведувањето на одлуките на Европскиот суд за човекови права за регистрацијата на македонските здруженија во Бугарија се најдоа и во резолуцијата на Европскиот парламент за која ќе се гласа на 8 октомври..