Сулејман Љамалари, на кого му се суди дека физички и вербално ја нападнал градоначалничката на Скопје Данела Арсовска тврди дека тој не бил напаѓач, туку жртва на инцидентот што се случи на 11 јули во скопската населба Чаир, кога Арсовска вршеше увид на терен по пријава за дивоградба. Љамалари познат и како командант Барути кој е поранешен вработен во ЈП „Паркови и зеленило“ на рочиштето на кое се изведуваа докази од страна на одбраната на обвинетиот, рече дека не тој, туку градоначалничката го удрила и го снимала со телефон.

-Тој ден јас не нападнав никого, бев нападнат од градоначалникот. Таа пријде кон мене со телефон, јас само со рака ѝ мафтав, сакав да ѝ го тргнам телефонот, да не снима неовластено. Оштетената ме удри со нога, ме клоцна со нога… Тука над коленицата, на левата нога – изјави Љамалари пред судот.

На местото како што кажа дошол со електричен тротинет кој „во ниеден момент го немав пуштено од рака“. Според неговите тврдења, инцидентот бил снимен од страна на градоначалничката и нејзиниот тим, но тој лично не направил никакви снимки.

Не можел да оди во болница веднаш по инцидентот затоа што бил задржан во полициска станица, и иако бил прегледан истиот ден, медицинските резултати пристигнале дури по полноќ. Потврди дека имало пцовки од двете страни, меѓу него и градоначалничката, не се сеќаваше дали пцуел други присутни, но тврди дека целата екипа на градоначалничката го навредувала.

Претходно, на првото рочиште кога обвинетиот се изјасни за невин, градоначалничката Данела Арсовска, го опиша настанот како „агресивен и опасен“. Во своето сведочење Арсовска изјави дека се чувствувала „загрозено, несигурно и исплашено“, а нападот, според неа, траел над 40 минути. Таа нагласи дека „агресијата континуирано растеше“ и дека „интервентната полиција мораше да нѐ вади“.

-Сите кои бевме присутни се чувствувавме небезбедно. Заканите кои беа изречени, лично мене ми предизвикаа чувство и на страв и на несигурност, особено имајќи предвид дека во ниту една секунда кај лицето немаше ниту трошка жалење за тоа што го направи. Напротив, агресијата континуирано растеше и продолжуваше со бројни закани и навреди упатени не само кон мене, туку и кон другите, изјави Арсовска.

Таа опиша дека нападот траел над 40 минути, во кои обвинетиот, и покрај интервенцијата од страна на полициските службеници, продолжил да се обидува да нападне и други претставници од градската администрација.

-Се почувствував небезбедно за мојот живот, за животот на моето семејство. Целиот час што го поминавме таму, во терор од континуирани закани и навреди, и самото тоа што мораше интервентна полиција да нѐ вади, почувствувавме дека сме небезбедни на местото, истакна таа.

Арсовска тврдеше дека обвинетиот бил истото лице што, според нејзини сознанија, и претходно ѝ упатувал закани преку социјалните мрежи. Таа изјави дека тие закани ги објавила јавно на својот профил и подоцна ги идентификувала како поврзани со обвинетиот.

Според обвинителниот предлог, Љамалари пристигнал со електричен тротинет и ја нападнал физички и вербално, при што ѝ нанел телесни повреди и изрекол сериозни закани.

Извор: МИА