Пред почетокот на учебната година почнуваат подготовките за сите првачиња. Родителите во дилема колку ќе ги чини стартот на учебната година. Екипата на „Слободен печат“ направи истражување и посети неколку книжарници и маркети каде може да се најде потребната училишна опрема која вклучува ранец, тетратки, прибор, моливи, боици, фломастери, несесер, блок, гума за бришење, темперни … Но, потребна ќе биде и нова облека, обувки, опрема за физичко, средства за хигиена, со што родителите кои имаат првачиња во просек би потрошиле од 150 до 200 евра.

Родителите кои оваа година имаат првачиња ќе треба да потрошат во просек околу 4.000 денари само за материјалот што им е потребен за настава. Олеснителна околност за родителите е што дел од скопските општини донесоа одлука да им помогнат со еднократна парична помош или обезбедување на неопходниот прибор.

Како се движи цената на школскиот материјал?

Низ книжарите може да се најдат ранци кои се движат од 600 па се до 5.000 денари. Тетратките А5 формат можат да се најдат по најниска цена од 17 денари, додека цената на А4 формат тетратките се движи од 50 до 150 денари.

Празните несесери се продаваат по цена од 100 па се до 1.150 денари. Оние несесери кои имаат комплетна опрема можат да се најдат за 160 денари, а најскапите се околу 2.650 денари.

Моливите, гумата за бришење и острилка во просек би чинеле околу 150 до 200 денари заедно.

Цената на севкупниот школски прибор зависи од брендот и квалитетот, може да се најдат материјали кои се поевтини и поскапи.

Каква помош даваат општините за првачињата?

Градоначалниците од неколку скопски општини најавија дека ќе излезат во пресрет на родителите кои оваа година имаат првачиња, со што ќе добијат парични средства, бесплатен прибор или ранец.

Околу 600 бесплатни ранци и училиштен прибор ќе добијат првачињата запишани во осумте основни училишта во Општина Центар.

Општина Аеродром донесе одлука да додели еднократна парична помош во износ од 3.500 денари, наменета за секое запишано прваче во училиштата на територија на општината. Околу 650 првачиња од осумте основни училишта во Општина Кисела Вода ќе добијат квалитетен анатомски ранец, тетратки и неопходен училиштен прибор.

Општина Гази Баба доделува еднократна финансиска поддршка од 3.000 денари за секое семејство кое ќе има запишано прваче. Општина Бутел ќе обезбеди високо квалитетен анатомски ранец со потребен училиштен прибор за непречен почеток на учебната година. Општина Ѓорче Петров исто така ќе обезбеди ранци за првачињата од шесте основни училишта.

Цената на севкупниот школски прибор зависи од брендот и квалитетот, може да се најдат материјали кои се поевтини и поскапи.

Овде секако не влегува сумата која скоро секој родител ја троши за трпеза за бабите и дедовците кои свечено доаѓаат на гости да му посакаат успешен почеток на школската година на своето внуче. Ако сакате да го одбележите овој ден со гости, веројатно ќе треба да одвоите уште толку средства.