Гитари и други предмети од колекцијата на англискиот музичар Џеф Бек се продадени на аукција за вкупно 8,7 милиони фунти, пренесува Би-би-си.

Повеќе од 130 гитари, со засилувачи и педали, од речиси шестдецениската кариера на гитаристот беа пуштени на аукција во четвртокот, а два од неговите инструменти беа продадени за повеќе од 1 милион фунти секоја. Гитарата „Оксблод Гибсон Лес Пол“ (Oxblood Gibson Les Paul) од 1954 година, за која се проценуваше дека ќе достигне цена од 500.000 фунти, е продадена за 1,06 милиони фунти.

Главната гитара за изведување и снимање на Бек од 1999 до 2014 година, „Фендер Стратокастер“ (Stratocaster Fender) позната како Анушка, исто така беше продадена за 1 милион фунти, откако првично беше проценета на 20.000 до 30.000 фунти.

Аукциската куќа „Кристи“ соопшти дека гитарата била „често користена и тешко оштетена за време на турнејата на Бек со Карлос Сантана“, што довело до мала пукнатина во вратот од неколку инчи и барала поправка.

Инаку, Џеф Бек почина на 78-годишна возраст во јануари 2023 година, по кариерата во која освои осум Греми награди и работеше со многу познати имиња, вклучувајќи ги Ози Озборн и Мик Џегер.

Британскиот музичар се прослави како дел од „Јардбрдс“, бенд во кој ја започна својата кариера и Џими Пејџ, заменувајќи го Ерик Клептон, пред да ја формира групата „Џеф Бек“ со Род Стјуарт. Од средината на 70-тите, тој се посвети главно на инструменталната музика, а од тогаш до денес, редовно е на самиот врв на безброј листи на најголеми рок-гитаристи на сите времиња.

Тој продолжи да свири музика до крајот на животот, а последната турнеја ја направи заедно со Џони Деп. Неговиот тон, присуство и пред сè јачина ја редефинирале гитарската музика во 1960-тите и влијаеле на движењата како хеви метал, џез-рок, па дури и панкот.

Џони Деп и Џеф Бек во новата песна користеле стихови што ги украле од поранешен осуденик?