Коледарски песни и коледарчиња, бадникови гранчиња и посна трпеза денеска го разубавија централниот градски плоштад во Крива Паланка како дел од организираната традиционална коледарска прослава од страна на општината.

Посната трпеза ја приреди годинашната кума, Габриела Стаменковска, општината подели топли напитоци, а свештените лица од Кумановско-Осоговската епархија, кривопаланечко архиерејско намесништво, во духот на христијанската традиција, ги осветија лепчињата со паричка.

Градоначалникот на Крива Паланка, Сашко Митовски, им ја честиташе новата година на своите сограѓани и празниците што претстојат, кога домот е исполнет со насмеани лица, а радоста го исполнува сечие срце.

– Празниците како Бадник и Божиќ, едни од најважните празници посветени на домот, огништето, семејството, не сплотуваат и ни ја покажуваат суштината на живеењето. Изреката „Каде и да си, за Бадник дома да си”- е моќна порака што упатува на непроценливата важност на семејните вредности и семејството како најважна алка во општеството. Мирот и хармонијата од домот се пренесуваат во работењето, во заедницата. Затоа, да ги негуваме овие вредности, да живееме по Божја промисла и по мерка. Она што секогаш го потенцирам е колку што можеме, да помогнеме, сите да можат да ја почувствуваат празничната хармонија. Празниците прославете ги во кругот на семејствата со свечена и убава атмосфера каква што ви посакувам да владее во сечиј дом секој ден од годината, порача Митовски во обраќањето.

Беа поделени лепчиња со паричка за сите што се пријавиле за кум наредната година, а најсреќна што ја пронајде паричката беше Емилија Стојковска.

Кумата Стаменковска го предаде кумството на Стојковска, а двете им посакаа здравје и благосостојба на своите сограѓани.

За сите граѓани беа обезбедени бадникови гранчиња што ги понесоа во своите домови.

Извор: МИА