Повеќе од 20 пати бил шампион на Македонија и имал повеќе од 30 настапи за македонската атлетска репрезентација на балкански, европски и светски натпреварувања – Кокан Ајановски, автор на книгата која неодамна излезе од печат „Трчањето ме учи“ во издание на ИК „Три“. И како што знае да се пошегува, ја има најубавата канцеларија – во природа, најчесто покрај кејот на Вардар. Тој вели дека сите натпревари се откажани во блиска иднина, но тој секогаш се подготвува најдобро што може да го трча неговиот животен маратон. А, можете и вие, доколку го прочитате ова инетервју со него за Слободен печат и дознаете дека трчањето е многу повеќе од физичка активност. Еве кои се бенефитите, како правилно да трчате, на каква подлога, но пред сè како да се мотивирате доколку немате навика. А како што ја соблекуваме повеќеслојната зимска облека, некако сите сакат да се „стават“ во добра форма.

Како да се мотивираат да вежбаат „мрзеливите“?

– Никого не може да натераме со сила да вежба. Она што зависи од нас, може да го направиме, а тоа е преку личен пример да бидеме мотивација, сите кои не спортуваат да посакаат да го направат тоа.

Што значи правилно трчање?

– За мене правилно трчање би значело да може да го правиме тоа во континуитет, кој би траел со години и години. Да немаме посериозни повреди и прекини во трчањето, а целиот овој процес да ни носи добро здравје, среќа и задоволство.

Зошто во природа, а не дома на справа?

-Сè си има своја убавина. Сите кои го одбрале трчањето, значи дека повеќе сакаат спортови што се одвиваат во надворешни услови. Мојот совет е покрај трчањето да имаме и вежби за јакнење на нашето тело, кои може да се изведуваат и со/на справи.

Каква опрема треба да имаме?

– Од опремата за трчање, најважни се патиките, па затоа треба на нивниот избор да посветиме и најмногу внимание. Опремата е важна, но најважна е силната волја која ќе нè води кон зацртаните цели.

На каква подлога преpорачуваш да се трча?

– Може да се трча по секаква подлога, но најчесто да биде на трева/земја. Трчањето по асфалт да биде во втор план. Трчање на тартан е значаен дел за оние кои се фокусирани на пократките патеки.

Кога има поголем ефект, да се трча наутро или навечер?

– Тоа е индивидуално. Мене ми е омилено утринското трчање, но има луѓе кои не сакаат да станат рано наутро и да спортуваат. Затоа, секој треба да си пронајде кое време во текот на денот најмногу му одговара за спортски активности. Важен совет е дека треба да тренираме во временскиот период кога ќе биде и самата трка.

Колку време пред и после трчањето да се јаде и што?

– Одговорот на ова прашање е сличен со одговорот на претходното прашање. Тоа е индивидуално, но некој генерален совет е дека убаво би било да се јаде најмалку еден час пред трчање. Што да се јаде исто така зависи од видот на тренингот што планираме да го направиме. Јадењето после трчање најдобро е да биде во првите 30 до 60 минути по завршувањето на тренингот.

Се зголемува ли интересот за физичка активност кај младите?

– Живееме во време кога младите повеќе ги интересираат компјутерите споредено со физичката активност. Според мене, недоволно спортуваат, но секако дека има напредок во овој поглед во последните десетина години. Наша задача е да направиме тие да сакаат да спортуваат.

Што можеме да научиме од твојата најнова книга?

– Најдобро би било вие да ми одговорите на ова прашање кога ќе ја прочитате. Среќен би бил ако книгата ве научила како да бидете посреќни, да напредувате во својот личен развој, како да верувате во себе, да ја подобрите својата дисциплина, да поставувате цели, никогаш да не се откажувате итн.

Кои се бенефитите од трчањето?

– Бенефити од трчањето има многу, како на пример: убаво чувство за време на трчање и по него, повеќе среќа, подобро психофизичко здравје, зголемена самодоверба, позитивни мисли итн. За многу повеќе од бенефитите, прочитајте во мојата книга „Трчањето ме учи“.