Додека Германија, како најголема европска економија, се соочува со криза, Полска доживува исклучителен економски раст и прави големи чекори кон престигнување на економските моќи на Европската Унија. Во последниот квартал, полската економија порасна за три проценти, што е три пати побрзо од просекот на ЕУ.

Кристофер Фус, експерт за полскиот пазар во германската организација „Germany Trade and Invest“, процени дека Полска е вистинската движечка сила на Европската Унија- објави Каматица.

Според Фус, клучот за успехот на Полска лежи во менталитетот на нејзините граѓани, кои се стремат кон раст, модернизација и прифаќање на новите технологии.

– Кога разгледувам низ Полска, воопшто не е необично што постарите луѓе користат апликации за паметни телефони како нешто што се подразбира, плаќајќи не со готовина, туку со мобилна апликација – истакна Фус.

Голем дел од административната работа се извршува преку Интернет, без непотребна документација, што овозможува основање на „стартап“ компании побрзо отколку во Германија. Полска стана и популарна индустриска локација, делумно поради ниските трошоци за работна сила.

Томас Обст, економист од Германскиот економски институт, се сеќава дека многу работа била префрлена во Полска токму поради оваа причина.

– Не инвестираат само полските компании, туку и многу странски, европски и американски – рече Обст.

Економскиот успех на Полска е видлив и на Варшавската берза, која порасна за 30 проценти од почетокот на годината. Сепак, тој раст наскоро би можел да заврши, бидејќи Полска се соочува со сериозен буџетски дефицит. Сепак, Обст истакнува дека високиот економски раст овозможува учеството на долгот во бруто домашниот производ (БДП) да остане релативно стабилно.

Финансиската помош од Европската Унија одигра значајна улога во економскиот развој на Полска, а и Фус и Обст се согласуваат дека земјата успеала да ги искористи тие пари на правилен начин. Тие веруваат дека Германија може многу да научи од својот сосед, особено во однос на флексибилноста и дигитализацијата.