Освојувачот на 20. грен слем трофеи, Рафаел Надал, вели дека би го избрал Бјорн Борг за противник доколку би можел да избира да игра меч со некој од поранешните тенисери.

Бјорн Борг изненадувачки многу рано ја прекина професионалната кариера, на само 26 години, а дотогаш шест пати го освои Ролан Гарос, а пет пати триумфираше на Вимблдон.

– Чувството кое го имав како дете беше дека Бјорн Борг е непобедлив тениски титан. Тоа беа поинакви времиња, но би сакал да играм против него – изјави Надал.

Надал е израмнет со Рожер Федерер на листата на тенисери со највеќе грен слем титули, и двајцата имаат по 20 триумфи на најголемите тениски турнири, а Шпанецот вели дека не се смета себе си за тешка личност.

– Мислам дека во прилог ми оди и податокот дека никогаш не сум го сменил тренерот. Малкумина се кои можат да кажат такво нешто. Или секогаш наидував на големи луѓе или мислам дека луѓето се совршени или едноставно мора да најдете начин да работите – кога не ви оди треба да се обвинувате себе си, а не тие околу вас – додава Надал.