Новиот текст на законот за работни односи, не ги опфаќа и работниците што немаат договор за вработување, но се во реален работен однос, што може да се одреди врз основа на поврзани факти. Сегашната дефиниција не е доволно прецизна и инклузивна и не обезбедува заштита на голем број работници, кои фактички работат, без договор за вработување или со поинаков договор, и не е во согласност со европското законодавство и меѓународните стандарди, констатираат Мрежата за заштита од дискриминација и Платформата за родова еднаквост.

Според нив, новиот текст на ЗРО не е усогласен целосно со законот за спречување и заштита од дискриминација и одредби што на работниците ќе им гарантираат сеопфатна и ефективна заштита од дискриминација.

– Новиот текст на ЗРО не е целосно усогласен со постојните меѓународни и европски стандарди и не обезбедува соодветна заштита, особено за посебните категории работници. Сѐ уште недостасува гарантирање и заштита на достоинството на работникот и по престанокот на работниот однос – посочуваат двете организации.

Од Мрежата за заштита од дискриминацијата и Платформата за родова еднаквост, порачуваат дека е добро што договорите на определено време ќе бидат на двојно помал рок, но тие се загрижени што договорите на определено време се секојдневна пракса и правило, наместо исклучок. Тие потсетуваат дека токму непродолжувањето на договорите на определено време се и најчестиот начин на дискриминација на бремените работнички.

Иако поздравуваат што новиот закон за работните односи за првпат зборува за платено мајчинско, татковско и родителско отсуство, овие организации реагираат што законот не е достапен за јавноста.

– Вака регулираното родителско отсуство ќе биде од особено значење за раниот развој на детето. Неопходно е допрецизирање на ваквите законски измени, односно законот да предвиди дека правото на отсуство поради бременост и родителство се исплаќа во целост (100 отсто од платата) на товар на Фондот за здравствено осигурување. Таквото допрецизирање е потребно за да се спречат основи за дискриминација на кандидати и кандидатки при вклучување на пазарот на трудот и нивно ставање во понеповолна положба поради користење на ова законско овозможено право – велат од невладините.

Синдикатот нотираше 40 „слаби точки“ на новиот работнички Устав