Во последните години, Босна и Херцеговина се обидува да се позиционира како туристичка дестинација на регионалната и европската мапа, со рекордни резултати во бројот на туристички пристигнувања и ноќевања. Сепак, додека официјалните институции се фалат со бројки и ја промовираат земјата на саеми низ целиот свет, позицијата на туристичките водичи, еден од клучните сегменти на туристичката понуда, е сè уште нерешена и хаотична.

Лиценцираните туристички водичи, како што се Санел Силајџиќ и Џана Бранковиќ, предупредуваат дека секторот на водичски услуги во Федерацијата на БиХ работи во сива зона, без јасен систем на контрола, што доведува до нелојална конкуренција, финансиска несигурност и колапс на квалитетот на услугата за туристите, пишува Фактор.ба.

Според важечкиот Закон за туризам на ФБиХ, дејноста туристички водич може да ја вршат само лиценцирани водичи кои регистрирале самостојна дејност. Сепак, практиката на терен е сосема поинаква. Лиценцираните водичи се соочуваат и со сериозни финансиски проблеми. Законот ги класифицира во категоријата независни дејности, заедно со нотарите и адвокатите, што значи дека тие плаќаат приближно 850 КМ придонеси месечно, без оглед на тоа колку работа имаат. – Во моментов, во БИХ не постои регистар на лиценцирани водичи, а последиците се сериозни и за самата дестинација.