Човекот зад брендот Uniqlo, кој неодамна ја прослави својата 40-годишнина, е 74-годишниот Тадаши Џанаи. Тој е основач и претседател на групацијата „Fast Retailing Co. Ltd.“ и, според релевантните податоци, најбогатиот човек во Јапонија. Тадаши Џанаи е прототип на тајкун во вистинска смисла на зборот – голем мајстор. Тој не дошол до богатство преку сомнителни начини, ниту е нов бизнис феномен, пишува порталот Бонитет.

По дипломирањето, Џанаи работел една година во синџир на продавници, а потоа се приклучил на кројачката работилница на својот татко. Таму го направил својот прв голем бизнис потег – ја преименувал компанијата на својот татко „Огори Шоџи“ во „Fast Retailing“ во 1991 година, кога имал 42 години. Потоа тој изјави за јапонските медиуми:

– Можеби сето ова изгледа како успех однадвор, но досега направив многу грешки. Луѓето обично ги сфаќаат своите неуспеси премногу сериозно. Суштината е да се остане таму со идејата дека ќе се најде успех во следната ситуација.

Ова ги постави темелите за градење глобална модна империја. Основните водечки принципи на компанијата се сè уште удобност, практичност, квалитетни материјали, универзалност и стил. „Fast Retailing“ ги обединува брендовите Uniqlo, GU, Helmut Lang, J Brand и Theory, а главната поддршка е сè уште Uniqlo, со околу 2.500 продавници во 25 земји низ целиот свет.

Џанаи и неговиот тим секојдневно се борат со најголемите конкуренти, „H&M“ и „Zara“ (Inditex). Компанијата „Fast Retailing“ и нејзиниот основач се познати по поставувањето високи цели.

– Нашата цел е да ја зголемуваме продажбата три пати на секоја деценија – рече Тадаши Џанаи.

Без оглед на целите, сите брендови под чадорот на компанијата ги следат принципите на висок квалитет, од набавка и дизајн, преку производство, па сè до продажба.

– Бизнисот со кој се занимаваме, како што е гардеробата, е тесно поврзан со секојдневниот живот на луѓето. Нашиот бизнис не може да биде добар ако живееме во свет кој е нестабилен и немирен. Нашата мисија е да понудиме удобност и висок квалитет на живот, и мислам дека сме единствената компанија во светот која јасно ги наведува овие деловни принципи и презема конкретни чекори за да ги спроведе во пракса – рече Џанаи со гордост.

Еден од клучните деловни потези, кој доведе до раст на продажбата и проширување надвор од Јапонија, беше договор со кинески производители на облека. Набргу потоа, Уникло почна да дизајнира, произведува и продава исклучиво сопствена гардероба.

Голем хит беше јакната од рециклиран полиестер, топла и практична, со цена од само 15 долари. До 1998 година, секој четврти Јапонец ја купил оваа јакна, а до 2000 година биле продадени дури 26 милиони. На почетокот на милениумот, Uniqlo почна да се шири на светскиот пазар, но сè не беше успешно. Во Велика Британија, 16 од 21 продавници беа затворени. Сепак, ова не го спречи Џанаи да ја прошири својата империја преземајќи други модни куќи. Клучната година беше 2006 година, кога беше отворена првата продавница во СоХо.

Од 2015 година, Uniqlo има повеќе од 1.600 продавници низ целиот свет, од кои 630 се надвор од Јапонија. Планот е да се отворат уште 100 продавници во Кина секоја година. Иако на 74-годишна возраст, Тадаши Џанаи нема намера да застане, а тоа го оправдува велејќи:

– Нема компромис со квалитетот. Единствената наша задача е неуморно и постојано да создаваме гардероба што е исклучително добра, со висок квалитет и што секој може да си ја дозволи. И, првото нешто што го сакам е нашите вработени да уживаат во својата работа и во околината во која работат. Треба да им обезбедиме средина што ќе ги тера да напредуваат секој ден. Знам дека звучи како апстракција и фраза, но на крајот сè се сведува на ова – правете го она што ве движи. И, за да продадеме нешто, мора да ги допреме срцата на нашите клиенти, а тоа е невозможно без човечки пристап кон бизнисот.

Богатата деловна историја на брендот Uniqlo го вклучува и името на Новак Ѓоковиќ, со кого компанијата соработуваше пет години, од 2012 до 2017 година.