Ако го пребарате генералот Олександр Сирски на интернет, тој ќе биде опишан како „најуспешниот генерал на 21 век досега“. Тоа е голема одговорност. Генералот Сирски ја предводеше одбраната на Киев на почетокот на целосната руска инвазија на Украина минатата година. Тој е мозокот зад изненадувачката и успешна контраофанзива на Украина во Харков минатото лето. Тој сега ја надгледува обновената офанзива како шеф на воените операции во источна Украина – една од двете главни оски на украинската контраофанзива.

Новинарите на „Би-Би-Си“ успеаа да разговараат со Сирски на тајна локација во Украина. Тие го прашале дали целта му е повторно да го освои Бахмут? Тој им се насмеал и им рекол: „Да, секако. Се обидувам да го направам тоа“.

Но, дури и тој признава дека, повеќе од еден месец од почетокот, долгоочекуваната офанзива на Украина се одвива побавно отколку што многумина се надеваа. „Би сакале да постигнеме многу брзи резултати“, вели генералот Сирски. „Но, во реалноста тоа е практично невозможно“.

Тој вели дека и на исток областа е преплавена со мини и одбранбени бариери. Русите, вели тој, имаат многу упоришта: „Значи, нашиот напредок навистина не оди толку брзо како што би сакале“.

Но, генералот Сирски верува дека Украина сè уште има една јасна предност. „Верувам дека единството на нашето воено раководство и довербата на нашите војници е една од силните страни на нашата војска. Ова е во целосна спротивност со руската воена хиерархија, која страда од внатрешни борби и редовно ги отстранува високите офицери од командната линија“.

Генералот Сирски е идол за оние околу него кои ја ценат неговата посветеност, решителност и лукавство. Како што тој раскажува, тој спиел само четири и пол часа на ден.

На југ и север од Бахмут, Украина соопшти дека им вратила на Русите територија од речиси 30 квадратни километри. Заменик-министерката за одбрана на Украина, Хана Маљар изјави дека руските сили во градот наскоро ќе бидат заробени.

За прв пат на источниот фронт, бројот на украинските сили сега се совпаѓа со бројот на руски војници – околу 160.000. Сепак, Русите сѐ уште имаат предност во артилерија.

Дали ситуацијата би можела да се промени со доаѓањето на американските касетни бомби, кои содржат десетици мали бомби кои можат да бидат расфрлани на пошироко подрачје, останува да се види во наредниот период. Повеќе од сто земји го имаат забрането ова оружје.

Генералот Сирски потврди дека американските касетни бомби сега пристигнале во Украина и ќе бидат подготвени за употреба за неколку дена. Генералот вели дека повторното заземање на Бахмут би имало повеќе од симболична вредност. Тој тврди дека градот има и стратешко значење – тој е порта кон другите клучни градови во регионот. Но, тој вели нешто уште поважно: „Нашиот народ чека на победи, му требаат мали победи“.