Неколку стотици граѓани на неделно ниво добиваат казни за неправилно паркирани возила низ градот, се прецизира во редовните известувања од „Паркизи на Општина Центар“ и од Министерството за внатрешни работи . Дел од автомобилите кои недозволено се оставени на јавен простор ги креваат „пајаците“ на двете јавни претпријатија задолжени за регулирање на паркирањето, по налог на сообраќајната полиција. И не помага тогаш ништо, ниту „ја оставив колата на пет минути“, ниту “немаше каде да паркирам, застанав на кратко“. Едноставно, казната мора да се плати, која воопшто не е занемарлива, затоа што освен глобата за недозволено паркирање, мора да се надомести и за „услугата“ на пајак – службите.

Но, за жал, овие казни не ги стигаат сите подеднакво. Жители на блокот од Градски ѕид каде е лоцирана полициската станица „Беко“ реагираа во нашата редакција дека вработените во станицата редовно си ги паркираат своите возила на улицата Даме Груев.

 Имаат паркинг тука, ама обично е полн и своите возила ги паркираат на улицата веднаш спроти катната гаража „Беко“. Секој ден е тоа така, ако не верувате, одете видете. И што е најинтересно на видно место во колата оставаат флуоресцентно полициско елече, да не им ги крене случајно пајак. Да се знае чии се. За нив не важат ли законите? Зошто ние граѓаните мораме да внимаваме каде паркираме, да плаќаме паркирање, а тие не? Затоа што работат во ПС „Беко“? Срамота! – револтирано вели еден од жителите.

На терен состојбата е токму таква. Во претпадневните часови редовно има паркирани возила вон паркингот. Дел од паркингот е раскопан и треба да се реконструира, но и покрај тоа и таму има паркирани возила. Граѓаните своето незадоволство го искажуваат и на социјалните мрежи и прашуваат дали полицајците се повластени.

Што се случува со раскопаниот пристап пред ПС „Беко“? Не може да се заврши реконструкцијата заради нивното одбивање да ги тргнат приватните неправилно паркирани возила? Конечно, станарите ќе ја тужат општината за необезбедување на пристап кон домовите и загрозување на нивната безбедност – коментира еден од жителите на Фејсбук.

За тоа дали вработените од ПС „Беко“ имаат ексклузивно право да се паркираат на улицата Даме Груев, и покрај тоа што тука има паркинг и катна гаража, и дали за нив не важат истите сообраќајни правила како за другите граѓани, побаравме одговор од Министерството за внатрешни работи.

Ве известуваме дека ПС ОН „Центар” има свој паркинг кој се користи за службени возила, а во тековниот месец јуни улицата Даме Груев е во реконструкција и асфалтирање, исто така во изградба е и велосипедска патека, при што на улицата има поголем метеж од паркирани возила, за што од страна на Одделението за безбедност на патниот сообраќај и патиштата – ОБПС при СВР Скопје константно се преземаат мерки за паркираните возила и непречено одвивање на сообраќајот на наведената улица – одговорија од МВР.

Оттаму не потврдија дека се работи за приватни автомобили на вработените во станицата, ниту дали ќе се преземе нешто да запре нивното недозволено паркирање на улицата Даме Груев, кај катната гаража „Беко“, поради што честопати се отежнува нормалното одвивање на сообраќајот, без за тоа да сносат некакви последици.

Па така, наместо полицијата да биде пример за тоа како треба да се почитуваат правилата за сообраќајот во мирување, во случајов, некои од вработените во станицата покажуваат дека за секое правило постојат и исклучоци, кои поминуваат неказнето.