Пазарот на трудот во Европа се менува брзо – технолошките иновации и недостатокот на квалификувани работници ја трансформираат побарувачката. Најновите податоци откриваат кои сектори и занимања се најбарани во водечките економии во Европа. Технолошкиот напредок и промените во потребите на европскиот пазар трансформираат многу сектори. Носителите на одлуки бараат итна акција за справување со недостигот на работна сила и вештини низ целиот континент.

Euronews Business ги анализираше 20-те најбарани сектори врз основа на податоците од глобалната платформа за вработување Indeed, која ги опфаќа пазарите на Велика Британија, Германија, Франција и Холандија, за периодот од март до мај 2025 година- објави Блиц Бизнис.

Менаџерските позиции, продажбата и работните места за инсталација и одржување се постојано меѓу првите пет во сите четири земји, што ги прави најбараните работни места во Европа. Работните места за инсталација и одржување сочинуваат 14,5% од огласите во Германија (најголем удел), 9% во Холандија (второ место), 6,9% во Франција (четврто место) и 5,7% во Велика Британија (петто место).

Работниците за одржување вршат широк спектар на поправки на инфраструктура, опрема и алатки, обезбедувајќи непречено функционирање на различни сектори. Поради универзалната потреба за овој профил, оваа професија се смета за стабилен избор на кариера. Мајсторите кои инсталираат системи и уреди во компании и домаќинства се многу барани во различни индустрии.

Менаџерските позиции сочинуваат 10,2% од огласите во Велика Британија (второ место), 10,1% во Холандија (прво место), 7,6% во Франција (трето место) и 6,4% во Германија (четврто место). Огласите за продажба учествуваат со 9,9% во Германија (второ место), 9,2% во Франција (прво место), 8,5% во Холандија (трето место) и 6,7% во Велика Британија (исто така трето место). Indeed нагласува дека повеќето компании зависат од квалификувани продажни тимови за да генерираат приходи и да постигнат раст.

Секторите за храна, администрација, софтвер и здравствена заштита се исто така на врвот. Секторот за угостителство има високи удели: 10,4% во Велика Британија (највисок меѓу сите сектори), 7,8% во Франција (второ место), 5,9% во Холандија. Нема податоци за овој сектор за Германија.

Административната поддршка е исто така многу барана и тоа 7,2% во Германија, 4,7% во Велика Британија, 4,4% во Холандија, 3,6% во Франција.

Други клучни сектори (над 3%) се услуги за чистење и санитарна нега, малопродажба, образование и настава, грижа и медицинска помош. Сектори како што се сметководство, производство и градежништво, исто така, регистрираа учество помеѓу 3% и 3,5%.

Во Велика Британија најбарани се работници во сектор лична и домашна нега, образование и настава, во Германија, лекари и чистачи, во Холандија медицински сестри и негователи и воспитувачи во градинка.