Пред голем број вљубеници во поезијата, деновиве беше промовирана втората поетска објава на Миле Миленкоски (првата негова стихозбирка „Бездомна љубов“ се појави во 1998 година) во издание на „Песнопој“ од Битола. Миленкоски е дипломиран геодетски инженер во Белград и е магистер по европски студии за интеграција и комуникации. Живее во Скопје, каде што работеше 25 години во администрација, од кои 23 во МНР.

Промотор на книгата беше писателот Горјан Петревски, а песни читаше актерот Игор Ангелов. Книгата „Кога вистината плаче“ донесува четириесетина песни изнедрени во време на бол и во необични услови (екстрадициски притвор).

Уверен во својата невиност, сигурен во триумфот на правдата, авторот пее за тагата, неправдата и за човечката злоба, но со силна љубов кон татковината и нејзините убавини, за нашиот опстој и пат кон иднината, а пред се за вербата во човекот. Кога вистината плаче сите треба да се загрижиме и да се запрашаме нешто. Оваа книга нуди прифатливи одговори и, како што рече промоторот Петрески, дури не се предаде, човекот е посилен од својата судбина.