Кога на почетокот на пролетта наместо да се грееме, ги вклучуваме клима уредите за ладење сигурно се прашувате кога повеќе трошиме струја. Експертите велат дека повеќе струја се троши кога грееме бидејќи просечната разлика помеѓу внатрешната и надворешната температура за време на загревањето е околу 16-17 степени, додека за време на ладењето оваа разлика не е поголема од осум степени. Она што дополнително ги интересира граѓаните е како да се намалат сметките и при греење, но секако и кога се разладуваме во текот на летните месеци.

На прашањето дали се троши повеќе струја за греење или за вклучување на климата за ладење, д-р Слободан Ружиќ, советник на Претпријатието за енергетска ефикасност, инженерство и консалтинг „Енерџи сајвинг груп“ вели дека за греење во Србија се троши многу повеќе струја отколку за ладење и тоа за 4-5 пати пишува Политика рс.

– Лошата изолација влијае на потрошувачката за греење исто толку лошо како и за ладење, значи ја зголемува потрошувачката. Бројот на денови кога е потребно греење е поголем од бројот на денови кога е потребно ладење, па и тоа е една од причините за зголемено трошење на струја. Сепак, постојат уште две важни причини. Првата е дека просечната разлика меѓу внатрешната и надворешната температура при загревање е околу 16-17 степени, додека при ладењето, разликата не е поголема од осум степени- објаснува Ружиќ.

Друга причина, посочува, е ефикасноста на уредите за греење и ладење.

– Во греењето доминираат уреди како старите Термо печки, греалки и котли чиешто ниво на ефикасност е ниско. Но уредите за ладење на просторот се многу ефикасни, обезбедуваат најмалку четири пати повеќе корисна енергија за ладење отколку што користат струја – вели експертот.

На прашањето што ако се покаже точно дека за пет до шест години на целиот регион може да му недостига една третина од сегашната количина на струја, како ќе се грееме, тој одговара дека проценките за вакво нагло зголемување на потрошувачката на струја се, во најмала рака, дискутабилни.

– Најголема опасност за нас се многу старите термоагрегати, поради нивните испади и посериозни дефекти, лесно можеме да дојдеме во ситуацијата што ја доживеавме на крајот на 2021 година. Поради ова, може да ни недостига енергија, а долгорочно, по 2050 година, и поради исчезнувањето на јагленот. Затоа треба да изградиме нови производствени капацитети. Во секој случај, ќе се ладиме исто како и досега, иако со уште поефикасни уреди од постоечките -вели Ружиќ.

Што се однесува до греењето, треба да вложиме максимални разумни напори да ја намалиме потрошувачката на електрична енергија за греење. Едниот начин е поврзување на домаќинствата со системите за парно греење, а другиот е гасификација и приклучување на индивидуални домаќинства на дистрибутивната мрежа за природен гас.

Според него, најдобар начин да се намалат трошоците за греење и ладење е добро да се изолираат становите.