Директорката на кочанската болница доктор Кристина Серафимова потврдува дека во болницата во Кочани останува докторката Катерина Паниќ како што побараа преживеаните во стравичниот пожар во дискотеката „Пулс“. Директорката вели дека наводите во писмото испратено од страна на повредените е оправдано, но и болницата се труди со натчовечки напори да одговори на потребите.

– За жал, во тој краток временски период на мое раководење се случи најголемата трагедија во историјта на нашата држава. Целиот персонал даде натчовечки напори за справување со истата. Продолжуваме со натчовечки напори да работиме на рехабилитација на повредените деца. Во нашата болница се третираат деца со полесен степен и физикален третман на истите. За поквалитена пружена здравствена нега нашата болница има склучено договори со пластични хирурзи од Клиника за пластична хирургија – Скопје, Градска хируршка болница ,,Наум Охридски“ – Скопје и со Клиничка болница Штип, вели директорката Серафимова.

Таа додава дека истовремено обуките за третирање на овие рани во кочанската болница ги имаат поминато и нивните хирурзи доктор Томе Солевски и доктор Катерина Мирчовска.

Благодарни сме им за нивниот ангажман и давање се од себе за децата да се чувствуваат сигурно и безбедно. Реакцијата на децата е оправдана, но ние како институција ја почитуваме волјата на нашата докторка за нејзино напредување во повисоки здравствени институции. Нејзината желба да замине во друга институција не го загрозува процесот на рехабилитација на децата, затоа што за нив ќе продолжат да се грижат врвни професионалци од хирургијата, како и хирурзи кои доаѓаат, доктор Јасмина Георгиевска, директор на Клиника за пластична хирургија со тим од пластична хирургија Скопје, потоа доктор Никола Костадинов, физијатар од Клиничка болница Штип и професионалци кои се обучени од овие области, доктор Симона Јованова – физијатар со целата екипа. Поврзаноста на нашата докторка со децата ќе остане засекогаш и тоа нас како институција не прави посебно горди и нејзиниот ангажман продолжува во кочанската болница, вели директорката на ЈЗУ болница Кочани Кристина Серафимова.

Министерството за здравство ќе ја остави доктор Катерина Паниќ во Кочани да се грижи за повредените, наспроти тоа што Таравари потпишал таа да оди во ГОБ „8 Септември“