Воздухот во Кочани деновиве е екстремно загаден, а граѓаните за тоа ја обвинуваат фабриката за хартија „Пејпер Мил“, за која тврдат дека согорува отпад и испушта големи количества чад во виздухот.

Државниот инспекторат за животна средина минатата недела направил вонреден инспекциски надзор и сега се чекаат наодите од земените проби за да се каже со сигурност дали кочанската фабрика „Пејпер Мил“ работела според пропишаното во А интегрираната еколошка дозвола. Мерењата на емисиите од Папер Мил биле правени од страна на лабораторија која не била акредитирана за таа постапка, па досега не можело со сигурност да се каже дали испустите на фабриката го загадувале воздухот над пропишаните граници, но од она што досега е утврдено, имало отстапување во вредностите на јаглерод моноксидот во однос на пропишаното.

Ова за Слободен Печат го потврди Ана Петровска, директорка на ДИЖС, во врска со проблемот со аерозагадување со кој веќе извесно време се соочени жителите на кочанската општина. По стапувањето на позицијата прв човек на Државниот инспекторат, Петровска вети дека дека кочанската фабрика за хартија ќе биде еден од приоритетите за утврдување на вистината дали таа е најголемиот загадувач во Кочани, како што тврдат жителите на овој град, кои во неколку наврати протестираа против загадувањето.

Неколку граѓански иницијативи во повеќе наврати иницираа протести на кои граѓаните побараа од надлежните „Пејпер Мил“ повеќе да не ги загадува бидејќи, како што велат, загадувањето предизвикало пораст на малигни и други тешки заболувања кај голем дел на популацијата, па и кај најмладите. Една од нив деновиве најави собирање на потписи на повеќе пунктови во градот, под мототото „Стоп за Пејпер Мил“.

Тие тврдат дека во кочанската фабрика за хартија се согорува секаков вид опасен отпад во вечерните часови, па дури и дека се согорува медицински отпад кој се носи со комбиња од Дрисла и дека тој го предизвикува чадот со специфична киселкава задушувачка миризба која ја чувствуваат посебно жителите на населбата во непосредна близина на фабриката.

– Живеам веднаш до фабриката и револтиран сум бидејќи секоја вечер исто мириса и секоја вечер го гледам чадот со свои очи. Почнаа и деца да се разболуваат од рак, што се должи на загадувањето во кое живееме – вели Антонио Тасевски од Кочани.

Од Државниот Инспекторат за животна средина потврдуваат дека кочанската фабрика, покрај котелот за согорување на природен гас, од пред извесно време поставила и котел за согорување на пелети, лушпи од сончоглед, оризова арпа и друг отпад од земјоделски производи. Овој материјал како енергенс е поефтин одошто природниот гас и може да предизвика покачување на вредностите на загадувачките честички поради несоодветно складирање на енергенсот или несоодветно функционирање на системот за пречистување, но оттаму категорично ја отфрлаат тезата дека се согорува опасен отпад, велат од ДИЖС.

И градоначалникот на Кочани, Николчо Илијев неодамна побара од Министерството за животна средина и државниот инспекторат да утврдат дали фабриката за хартија „Пејпер мил“ работи согласно еколошките стандарди. Граѓанските активисти и жителите на Кочани  бараат од надлежните институции да се реши проблемот со загадувањето на воздухот, но и водата, бидејќи, како што тврдат „Пејпер Мил“ го загадува и воздухот и водата на оближната Кочанска река, која е притока на Брегалница.