Претседателот на МАНУ, академик Љупчо Коцарев, одби да ги коментира изјавите на академик Абдулменаф Беџети дека „ја прифаќа фрлената ракавица“ од академик Катица Ќулафкова за формирање трета албанска академија.

Тој не сака да зборува за поделбите во Академијата, но најави дека очекува за сите прашања Собранието на МАНУ да заседава по одморите. Коцарев за „Слободен печат“ потврди и дека во МАНУ била закажана седница за францускиот предлог, но дека ја одложиле за по одморите.

„Не би коментирал ништо за академик Беџети. Тие прашања треба да се разговараат внатре во Акдемијата. По одморите ако некое од одделенијата побара, Собранието ќе оддржи седница. Седницата пак, за францускиот предлог точно е дека беше закажана, па одложена за по одморите. Ја одложивме бидејќи за денот кога беше закажан,а сѐ уште го немавме на увид францускиот предлог“, ни изјави Коцарев и додаде дека ако од седницата произлезат заклучоци, тие ќе бидат споделени со јавноста.

Поделбите и недоразбирањата помеѓу академиците почнале по изборот на нови членови на МАНУ, а кулминираа по францускиот предлог и протестите против прифаќањето на преговарачката рамка, а на кои учествуваа и претседателот Коцарев и академик Ќулавкова. Ќе се подели ли МАНУ на паралелни еднонационални академии или ставовите на дел академици ќе останат изолирани, ќе биде појасно во септември.