Коалицијата „Србија против насилство“ подготвила детален документ врз основа на предлозите на ПроГлас и граѓанскиот сектор во однос на изборните услови, кој вклучува формирање на независна комисија и како долгорочно решение, преодна влада по урнек на Северна Македонија, изјавил во име на оваа коалиција Радомир Лазовиќ на прес конференција во салата на Народното собрание, јавува дописникот на МИА од Белград.

Тој побарал Собранието да формира посебна Комисија за организирање избори, во која ќе членуваат претставници на власта, опозицијата и граѓанскиот сектор, со надзорни и извршни овластувања.

Долгорочно, тие предлагаат промена на законот, по примерот на Северна Македонија, и формирање преодна влада во која опозицијата би имала најмалку двајца министри, за внатрешни работи и за локална самоуправа.

Тој истакна дека концептот на преодна влада во моментов е актуелен во Северна Македонија.

„Телото што го предложивме треба да биде во функција до следните избори бидејќи можеби нема да има време да се направат промени кои би доведеле до преодна влада. Во наредниот период како долгорочно решение ќе предложиме од денот на распишувањето до денот на изборите да се создаде преоден дел од владата со две министерства предводени од опозицијата, за да можеме да кажеме дека имаме фер избори“, објасни тој.

Лазовиќ во име на СПН поднесол барање за целосна и независна ревизија на избирачкиот список, која би опфатила теренска контрола на избирачкиот список, во која би учествувала независна комисија според методологијата изработена од невладината Црта.

Лазовиќ изјавил и дека Собранието треба да донесе обврзувачки упатства за медиумите, за донесување нови програми, забрана на говор на омраза и лаги и надворешен надзор.

Упатството требало да го подготви независна комисија за медиуми составена од претставници на професионални здруженија.