Со поскапи ски-билети, но неизменет капацитет за скијање и инфраструктура во споредба со изминатата година ќе почне ски-сезоната во зимскиот рекреативен центар Попова Шапка. Сезоната треба да почне откако ќе падне природен снег, а за употреба на инсталацијата за вештачки снег засега нема никакви најави.

Од „ЕЛЕМ Турс“, јавно претпријатие кое управува со ски-центарот, велат дека билетот е неопходно да поскапи, оти и цената струјата која ги покренува ски-лифтовите е покачена.

– Ние ги сервисираме ски-лифтовите, ќе функционираме со полн капацитет. Од година во година имаме гости сè повеќе, во добри релации сме со ски-центрите во регионот. Ако купите сезонска карта за Попова Шапка, три дена може да скијате и во ски-центарот Колашин во Црна Гора, со кој потпишавме договор за соработка, контактираме и со другите ски-центри – вели Адем Авзиу директорот на ЈП Елем турс, кое стопанисува со ски-центарот Попова Шапка.

Според него, се црпат искуства од поразвиените центри Јахорина во БиХ и „Скијалиште Србија“, се бара начин за развивање летна програма, која сепак бара сериозни инвестиции,

– Водиме разговори за пронаоѓање на стратешки инвеститор за Попова Шапка. Дали ќе стане збор за издавање на концесија на ски-центарот, јавно- приватно партнерство или нешто друго, последниот збор го има Владата – додаде Авзиу.

Последниве две сезони на центарот профункциоира т.н. шестосед, со кој се растоварија другите ски- лифтови. Но, со поголемиот број туристи дојде до израз проблемот со недостигот на паркинг-простор. Паркирани колони возила го блокираа патот Тетово – Попова Шапка речиси секој викенд за време на скијачката сезона.

Жарко Трпковски од скијачкиот клуб Љуботен и познавач на состојбите на центарот вели дека не постои во светот таков инвеститор кој би инвестирал во Попова Шапка каде не се уредени имотно-правните односи, нема основна инфраструктура и има смет насекаде.

– Имотен лист ски-центарот има само за жичницата, но само за објектот во Тетово. Не е уредена состојбата со сметот и канализацијата, а нормално дека тој што сака да инвестира, очекува и да не се соочува со проблеми поврзани со основната инфраструктура – вели Трпковски.

Тој предлага да се преземе моделот од Скијалиште Србија, кој се покажува успешен, односно со жичниците и ски-лифтовите да управува јавно претпрјатие.

 – Ако имате добра база, односно основна инфраструктура за скијање и средени комуналии и урбанизам, инвеститорите ќе дојдат сами. Лани Јахорина сезоната ја отвори прва, а ја затвори последна во Европа. Имаат најдобар летен авантура парк, инвестираат во нова жичница. Имаат визија, добар менаџер, затоа имаат успех, но и државата стои целосно позади тоа. Државата ако инвестира во жичници и инфраструктура, ќе привлече инвестори кои ќе градат хотели и туристички капацитети, а државата ќе се ги поврати парите од туризмот преку ДДВ – вели Трпковски.

Тој додава дека според повеќе светски студии, Попова Шапка, односно Шар Планина, има капацитет за 500 000 скијачи на ден, само ако се вложи голем капитал. Тоа се милијарди евра промет, сума која го надминува бруто-домашниот производ.

Досега за скијачкиот центар Попова Шапка и оваа и минатата власт, имаа направено голем број физибилити студии, мастер планови, економски анализи за развој на центарот, но тие засега се само на хартија.