Министерството за здравство по вторпат ќе распише тендер за санација и обнова на компресорската станица во Клиничкиот центар „Мајка Тереза“, откако првиот тендер пропадна. Како што за „Слободен печат“ информираат од Министерството за здравство, уште го бараат модусот за распишување на вториот јавен повик.

На првиот повик ниту една фирма не поднела понуда, а проценетата вредност беше 300 илјади евра, кои најверојатно не биле атрактивна сума за ниедна фирма. Три фирми се појавиле на увид да ја разгледаат компресорската станица, ама ниедна од нив не испратила понуда за да ја санира.

Компресорската станица е стара и 30 години не е променета. Пред неколку месеци поради ширење лоша миризба за која не се утврди од каде потекнува ниту што ја предизвикува, компресорската станица беше исклучена од употреба и сите операции во хируршките клиники на Клинички почнаа да се изведуваат со надворешни компресори. Редуцираниот интензитет на хируршки интервенции што се вршат во хируршките клиники придонесоа најголем дел од товарот да падне на старата Градска болница и ГОБ „8 Септември“.

Пропаднатиот прв тендер го отвора прашањето дали ќе се успее да се реализира првичната најава дека компресорската станица ќе биде променета најдоцна до декември, со оглед на тоа што пропаѓањето на тендерот придонесува да се пробиваат планираните рокови.

Заедничките служби на Клинички центар доставија оперативен план до Владата, според кој имаа предвидени рокови за постапување. Нивните рокови се пролонгираат затоа што ниедна фирма не се јавила на тендерот.

Тендерот беше распишан како „поедноставена отворена постапка, за набавка, монтажа и пуштање во работа на систем за компримиран воздух“, но ни поедноставената постапка не ги мотивираше економските оператори да се пријават.

Крајниот рок за доставување на понудите беше до понеделникот во 11 часот, со проценета вредност на набавката од 18.644.068 денари без ДДВ.

Во тендерската документација беше предвидена задолжителна посета на локација заради важноста на самата набавка за здравјето и безбедноста на пациентите.

Посета на локација побараа три економски и на истите им беше овозможено посета на локација. За нас од непознати причини до денот на отворање не е пристигната ниту една понуда.

Заради напред наведеното денес од страна на ЈУ од областа на здравството донесена е Одлука за поништување на постапката, известени се Министерството за здравство и Владата на РСМ и побарани се натамошни насоки за постапување, рекоа за „Слободен печат“ од Јавна установа од областа на здравството за потребите на ЈЗУ УК, завод и ургентен центар Скопје.

Министерот за здравство Арбен Таравари пред објавувањето на тендерот рече дека очекува постапката за решавање на проблемот да заврши до крајот на годината, кога би бил инсталиран системот, но и додаде дека ќе се залага за побрзо решавање од овој рок. Сепак, на терен состојбата стагнира во бирократскиот лавиринт.

– Времето до кога треба да се заврши и да се поправи, се надевам дека ќе биде крајот на декември, а ние ќе инстистираме што поскоро да заврши и да бидат функционални салите – рече министерот пред распишувањето на сега пропаднатиот тендер.

Редовната работа и функционирање на операционите сали се наруши откако поради непријатна миризба, тие беа затворени. Никој никогаш не извести што покажаа анализите испратени во Германија за тоа каде е дефектот.

Пациентите, благодарение на тоа што компресорската станица е исклучена од употреба, се во неизвесност поради редуцираните интервенции.

Компресорите откажале при операција на дете и на болен од карцином, ама на министерот Таравари никој не му кажува

Хаваријата со компресорот на Клинички ќе се санира половина година – пациентите ќе страдаат