Министерката за образование и наука Весна Јаневска денеска соопшти дека во 150 училишта каде немало или не била потреба градежна активност веќе има едносменска настава  и додаде дека очекува овој процес да продолжи во уште 25 училишта во кои, како што појасни, ќе има потреба од доградба на училници за да може да ги опфатат сите ученици во една смена.

-Сигурно почнуваме во пет, почнуваме во општините Ѓорче Петров и Карпош, а потоа продолжуваме и во други. Оваа година очекувам да започнеме работи во 25 училишта кои, секако, ќе бидат подолготрајни и ќе преминат во следната година – изјави Јаневска при увидот за изградба на училишна спортска сала во општина Петровец.

Јаневска истакна дека воведувањето на едносменската настава е поврзано со наоѓање на начин за подобрување на училишната мрежа што, како што рече, „не е лесен процес“.

-Тој е почнат, добро се одвива и понатаму ќе се одвива. Верувам дека најголем дел ќе успееме да го завршиме во еден мандат, но верувам дека и тие што ќе дојдат после нас ќе го продолжат затоа што тоа е исклучително важно за квалитетот на образованието и во корист на учениците- посочи министерката.