Портпаролот на Советот за национална безбедност на САД, Џон Кирби денеска изјави дека САД понудиле поддршка на казахстанско-азербејџанската истрага за падот на авионот на Азербејџан ерлајнс во средата во Казахстан, при што загинаа 38 лица, а 29 беа повредени.

Кирби изјавил дека првите индиции до одреден степен укажуваат дека овој авион бил соборен од руска противвоздушна одбрана, пренесува порталот Аксиос.

Азербејџан ерлајнс изјави дека нивниот авион доживеал надворешни физички и технички нарушувања.

Авионот летал од Баку за Грозни, главниот град на руската република Чеченија, кога се урнал во близина на градот Актау во Казахстан, пренесува Танјуг.

Неименуван казахстански функционер им рекол на новинарите дека во авионот експлодирала боца со кислород неколку моменти пред да се урне.

Според Аксиос, еден од преживеаните патници рекол дека пилотот двапати се обидел да слета во маглата над Грозни, а потоа при третиот обид нешто експлодирало и дел од авионот бил откорнат.

Чеченија е една од неколкуте области каде руските системи за противвоздушна одбрана гаѓаат украински беспилотни летала, потсетува Аксиос.

Британската компанија за воздухопловна безбедност Osprey Flight Solutions исто така соопшти дека авионот најверојатно бил соборен од руската воздушна одбрана.

Советник на компанијата Сибилин за Би-Би-Си изјави дека трагите од шрапнелите што се гледаат на задниот дел од авионот се многу слични на ефектот на рускиот систем за противвоздушна одбрана.

Портпаролот на Кремљ, Дмитриј Песков, рече дека би било погрешно да се прават какви било претпоставки пред да се заврши истрагата.