Кипарската Влада на денешната седница одлучи да ја намали минималната старост за остварување на правото на глас, дозволувајќи на избори да гласаат сите во државата кои имаат наполнети 17 години, јавија локалните медиуми.

– Се надевам дека Парламентот веднаш ќе одговори, така што на следните избори, а тоа се парламентарните избори во 2026 година, нашите млади од 17-годишна возраст ќе учествуваат во изборниот процес, како што е случај во другите земји-членки на Европската Унија, рече Претседателот на Кипар Никос Христодулидис на почетокот на владината седница.

Христодулидис рече дека денеска е „историски ден за демократијата во земјата“.

Владината иницијатива е дел од пакетот измени на Изборниот законик кои беа одобрени на денешната седница и ќе бидат испратени на гласање во Парламентот.