Кинескиот интернет регулатор – CAC – им забрани на најголемите технолошки компании во земјата да купуваат чипови за вештачка интелигенција на Nvidia. Според извори на Financial Times, CAC им наредил на компании како ByteDance и Alibaba да ги прекинат тестирањата и нарачките за чипот RTX Pro 6000D, кој Nvidia го разви специјално за кинескиот пазар, а изворите додадоа дека одлуката ги претставува напорите на Пекинг да ја зголеми домашната конкурентност и да ја намали зависноста од САД.

Акциите на Nvidia паднаа за 2,7 проценти на 17 септември- пренесе Политика.рс. Неколку компании претходно планираа да нарачаат десетици илјади чипови и веќе почнаа да ги тестираат со добавувачите на сервери на Nvidia, велат изворите, додавајќи дека по наредбата на CAC, тие компании ги известиле своите добавувачи да го прекинат производството.

Забраната доаѓа откако кинеските регулатори заклучија дека домашните чипови ги достигнале перформансите на моделите што се користат во Кина. Јенсен Хуанг, извршен директор на Nvidia, рече дека очекува да разговара со американскиот претседател Доналд Трамп за можноста на Nvidia да работи во Кина.

„Можеме да му служиме на пазарот само ако земјата сака да бидеме таму. Разочаран сум од она што го гледам, но има поголеми цели што треба да се разработат меѓу САД и Кина. Ќе бидеме трпеливи“, рече Хуанг.

RTX Pro 6000D, кој може да се користи во автоматизирано производство, беше последниот производ што Nvidia доби дозвола да го продава во значителни количини во Кина.

Регулаторите во Кина неодамна ги повикаа домашните производители на чипови како Huawei, како и компании како Alibaba и Baidu, кои исто така произведуваат свои полупроводници, да достават извештаи за тоа како нивните производи се споредуваат со чиповите на Nvidia специфични за Кина.