Кина изрази загриженост во врска со американскиот проект за изградба на противракетниот штит „Златна купола“ и го повика Вашингтон да се откаже од неговиот развој и распоредување, според портпаролот на кинеското Министерство за надворешни работи.

Претседателот на Соединетите Американски Држави, Доналд Трамп, вчера објави дека архитектонскиот проект за противракетниот одбранбен систем „Златна купола“ е избран за заштита на САД од надворешни закани, дека системот ќе биде готов до 2029 година и ќе чини 175 милијарди долари.

Трамп прецизираше дека буџетскиот пакет на кој републиканците моментално работат на Капитол Хил ќе вклучува 25 милијарди долари за почеток на изградбата на системот за противракетна одбрана, и дека вкупната цена на проектот ќе биде околу 175 милијарди долари, иако може да биде многу поголема.