Македонската кадетска кошаркарска репрезентација со пораз ги отвори настапите на Европското првенство Б-дивизија, кое денеска стартуваше во Скопје. И тоа не било каков пораз, нашите млади надежи беа поразени од Кипар со 76-82, иако речиси целиот натпревар го контролираа резултатот.

Избраниците на селекторот имаа девет поени предност на помалку од четири минути до крајот (72-63) и се чинеше дека се на добар пат кон сигурна победа. Но, тогаш како да се „исклучи светлото“. Кипарците го завршија натпреварот со неверојатна серија од 19-4, погодија пет тројки во последните три минути, а нашиот тим немоќно гледаше како водството се топи и прераснува во пораз.

Кипар реализираше дури 14 тројки од 40 обиди и покажа дека во младинската кошарка нема сигурни победи на хартија, особено не кога противникот добива ветер во грб во клучниот момент.

И покрај поразот, блескаше Лука Чучанов со моќен дабл-дабл од 18 поени и 16 скока, но неговата партија остана некрунисана.

По овој неочекуван кикс, Македонија нема простор за нови грешки, секој следен натпревар е „да се биде или не“ во трката за четвртфинале.