Украинската армија во изминатиот месец ослободила повеќе од 600 населени места од руската окупација, од кои 75 се во стратешки исклучително важната област Херсон, соопшти украинското Министерство за реинтеграција на привремено окупираните области. Околу 500 населби се ослободени во североисточниот регион Харков, каде што украинските сили минатиот месец постигнаа голем напредок пробивајќи ги руските линии, објави украинското министерство доцна во четвртокот.

Во соопштението на министерството се наведува и дека 43 населени места се ослободени во регионот на Доњецк, а седум во регионот на Луганск. „Површината на ослободените украински територии е значително зголемена“, соопшти украинското министерство на својата веб-страница.

Агенцијата Ројтерс јавува дека не било можно самостојно да се проверат овие наводи и дека се уште не е пристигната директна потврда ниту од украинската армија ниту од кабинетот на украинскиот претседател.

Регионите Херсон, Доњецк и Луганск, заедно со Запорожје, беа „анектирани“ од Русија на крајот на минатиот месец додека контраофанзивите на украинските сили брзо напредуваа на североисток, исток и југ. Руските „анексии“ беа наречени нелегални и од Киев и од Западот.

Во четвртокот, во украинската област Херсон, тамошниот гувернер назначен од Русија апелираше до жителите да ја напуштат областа додека продолжуваат борбите меѓу руските и украинските сили.

Украина започна контраофанзива кон крајот на август за да ги истера руските сили кои ја окупираа земјата од почетокот на инвазијата во февруари. Русија продолжува да го нарекува својот напад врз Украина „специјална воена операција“ за демилитаризација и „деназификација“ на таа земја.