Поранешниот американски дипломат Хенри Кисинџер изјави денеска дека е дојдено време за крај на конфликтот во Украина со цел да се намали ризикот од нова катастрофална светска војна, но Владата во Киев ги отфрли тие коментари и нагласи дека не може да има договор кој вклучува отстапување на украинска територија.

„Постигнувањето мир во секој случај треба да ги поврзе Украина и НАТО. Неутралноста како алтернатива повеќе нема смисла“, напиша Кисинџер (99) во едиторијал за магазинот „Спектатор“, пренесе Ројтерс.

Тој додаде дека во мај оваа година предложил прекин на конфликтот, по што Русија ќе се повлече на првите линии од пред почетокот на конфликтот, но Крим ќе остане „предмет на преговори“. Помошникот на украинскиот претседател Михаил Подољак на својот профил на Телеграм напиша дека „г-дин Кисинџер ништо не разбрал“.

„Рецептот на кој тој повикува, но се плаши гласно да го каже е едноставен – смирете го агресорот жртвувајќи делови од Украина, со гаранции за ненапаѓање на другите источноевропски земји“, напиша Подољак.

Тој додаде дека сите оние кои се залагаат за мир „треба да разберат дека секој договор со ѓаволот, односно мир на сметка на украинските територии, е победа на Путин, како и рецепт за успех на автократите ширум светот“.

Хенри Кисинџер беше државен секретар на САД за време на претседателите Ричард Никсон и Џералд Форд и се сретна со Владимир Путин неколку пати откако Путин стана претседател на Русија, наведува Ројтерс.

Директорот на американската Централна разузнавачка агенција (ЦИА), Вилијам Барнс, на почетокот на неделава изјави дека оценката на агенцијата е дека Русија се’ уште не е подготвена сериозно да пристапи кон мировните преговори, иако, како што наведе, повеќето конфликти завршуваат со мировни преговори.

Ројтерс не потсетува на ставот на Путин дека руската „специјална воена операција“ е пресвртница и дека Русија конечно застана пред западниот блок предводен од САД. Во написот за Спектатор, Кисинџер истакна дека обидите да се „направи Русија импотентна“ или дури „да се бара нејзино распаѓање“ може да „предизвикаат хаос“.